TURA: Garo Hills Autonomous District Council (GHADC)-ni gitcham MDC saksa Willy D Shira, adita salrangna skang, Trinamool Congress (TMC)-o napangaha.
Rongrikkimgre constituency-ni gitcham MDC aro Chokpot Congress Block-ni gitcham president Willy D Shira-ko Chokpot-ni TMC MLA Lazarus M Sangma aro TMC-ni gipin dilgiparang, TMC-ona rimchaksoaha.
Meghalaya a·doko Trinamool Congress (TMC)-ko bikotchenga intalan Opposition dolni dilgipa Dr Mukul Sangma aro dingtang dingtang dilgiparang, Meghalaya a·dok gimikon TMC-ko bilakbatatna kamrangko ka·chichatokengaha aro re·baenggipa 2023 bilsion Meghalaya Assembly election-ko ong·atna siengahani gimin da·o TMC-ni dilgiparang, Garo Hills-ni dingtang dingtang biaprangonaba wenroroe, gital membor-rangko biming segattokengahachim.
Indake ong·engon, batanggimin salrango, TMC-ni tom·anirangko Tura-ni Wadanang, Chokpot aro Gambegre jolrangoba ong·ate, gital membor-rangko biming segattokaha ine kobor on·aha.