AMPATI: Jal Shakti Abhiyan (JSA)-ni sakgni central official-rang, chong·motan India sorkarini ning·o donggipa MSME Ministry-ni Joint Secretary Mercy Epao aro Pune-o donggipa Central Water & Power Research Station-ni Scientist ‘C’ VK Shukla, re·anggipa Sukrobar aro Sonibar salrang, South West Garo Hills a·jaona re·baenba, JSA-ni ning·o ra·gatgipa dingtang dingtang project-rangko nie ra·angaha.
Ia project-rangko niena skang, ma·mongoni re·bagipa official sakgniko, South West Garo Hills a·jani Deputy Commissioner in-charge AVD Shira aro dingtang dingtang department-ni officer-rang, Ampati Circuit House-o rimchaksoaha aro ia tom·anio uamangni re·baani miksonganirangko jinmana talate on·angaha.
South West Garo Hills a·jao chiring chibisikrangsan ong·aigija manderangni kitgipa pokkrirangba kraa gitan dongani gimin chi chimongani kamrangko altubatatgen ine janapatengon, a·jao man·gipa cholrangko jakkale kamrangko ka·china aro na·tok jilani kamrangko namdapatna gita Fishery department baksa nangrime kam ka·china gita ma·mongni official-rang pilak department-rangkon didiangaha.
Namroro silroroani kamrangna Meghalaya sorkarini on·gilanirangko ua chu·ongnikaha ine janapatengon, South West Garo Hills a·jao manderangni namgnia dingtang dingtang scheme-rangko chu·sokate on·engani giminba ua kusi ong·a ine Epao parakangaha.
Chimite, Nogorpara aro Kumligaon songrangona re·angani somoioba Epao, songni manderang baksa agangrike, an·tangtangni chi pokkrirangko aro chiring chibisikrangko namdapatna gita MSME Ministry aro dingtang dingtang department-rangni dakchakanirangko ra·china didiangaha.
