TURA: West aro North Garo Hills a·jarango ga·akgipa B-Mahal-ni a·arangko NPP-chi dilenggipa Garo Hills Autonomous District Council (GHADC)-ni Executive Committee, jolo songdongenggipa aro songni nokni dilgiparang baksa agangrikchenggija a·dok sorkarini Meghalaya Industrial Development Corporation (MIDC) aro Meghalaya Tourist Development Corporation (MTDC)-na on·aha ine parakatani ja·man iandake B-Mahal-ni a·arangko jolni manderang baksa agangrikchenggija sorkarina on·ahani gimin Association for Democracy & Empowerment (ADE) jegalatenba, iani bidingo Garo Hills-ni manderangna talate on·china GHADC-ni dilgiparangko didiataha.
Garo Hills-ni B-Mahal-o ga·akgipa a·arangko MIDC aro MTDC-na NPP-chi dilenggipa Executive Committee pale galengani ine koborko man·soahani giminsa EC-oniko tale ra·na gita GHADC-ni session-o chanchirimna gita Opposition MDC-rang motion-ko ra·baahachim indiba ia motion-ko Executive Committee ra·chakjaha ine GHADC session-oni ong·kate katgrimani ja·man, Opposition MDC-rang parakatahachim.
Indake ong·engon, Opposition MDC-rangni chanchirimna ra·anggipa motion-ko NPP-chi dilenggipa EC-ni jegalsoahani gimin ADE suk ong·gijaniko parakatenba, Assembly-rango ba District Council-rango dilgiparang apsan chanchirimanichisa ba jera ra·grikanichisa, kamrangko ka·anio olgrokani ba ong·gija dakanirang donggenchimoba namdapatna ba talgrike ra·na man·a ine ADE-ni president Dalseng Bira Ch Momin parakataha.
“B-Mahal-ni a·arangko sorkarina pala ba on·a ine matnanganiara Garo Hills-o songdongenggipa mande sakantinan su·dikaniko ra·baani gita ong·aha indiba iani bidingo chanchirimna ba jera ra·grikna Opposition MDC-rangni ra·baaniko Executive Committee-ni jegalaniara, dilgiparangni kamko chanchichipna kraani ong·aha,” ine Momin parakataha.
Manderangni pattianiko man·esa political dolrang bilona re·baenga ine janapatengon, manderangni namgnina kam ka·ani aro manderangni nangnikaniko chu·sokatanian ua dolni daito ong·skaa ine ADE-ni president parakataha.
“Uni gimin B-Mahal-ni badiaba bakrangko rattonge galna skang, bilo ong·enggipa dilgiparang, iani bidingo jolo songdongenggipa manderang, a·king Nokmarang aro jolni NGO-rang baksa agan-chanchirimchenganirangko dakna nanngchongmota. Iani bidingo jolni dilgiparang aro a·king Nokmarang baksa agangrikchengjagenchimode ba talate on·na man·jagenchimode iako ADE jrip nie dongjawa aro gipin dolrang baksa a·dok gimik jegalanirangko dakanggen,” ine Momin parakataha.