TURA: Tura Christian Hospital baksa nangrime, Sasatgre jolo donggipa Sakal A·duma songo Christian Mission Nursing School-ko rikna siengani gimin ia nursing school-ko rikanio tangka paisarangko on·gile dakchakaniko on·pana gita Sonibar salo, A·chik Heritage Pursuits (AHP) dolni gita Lottery, housie aro sales day-ko Tura-ni Walbakgre-o donggipa Green Haven-o ong·atangaha.
Ia program-ko ong·atanio gong 3,50,000/- tangkarangko AHP chimongna man·aha aro ia tangkarangko AHP-ni dilgiparang, Tura Christian Hospital-ni ning·o donggipa ADMC-ni chairman-na pakwate on·ataha.
Lottery-ko Pajero Sport garina kal·ataha aro ia boksisko Tura Cherangre-oni Togan K Marak man·angaha ine kobor on·aha.
AHP-ni u·iatani gitade, Nokrek jolrango songdongenggipa manderangna sanna banani cholrang dongkujaengani gimin Nokrek a·bri ja·reko donggipa Sakal A·duma songo Nursing Training Centre-ko rikna gita Tura Christian Hospital Management Committee, AHP baksa nangrime kamrangko ka·engachim.
Iana Sakal A·duma songni Poljongsing M Sangma minggipa mande an·tangan, an·tangni a·akoba jaksrambee on·ahachim.