SHILLONG: July 27 tarikna skangan Meghalaya a·dokni SSA skulrango skigiparangna jabrini dormaharangko watatgnok ine sorkari ku·rachakaniko on·angani ja·manoba East Khasi Hills a·jao skigiparangni dormaharang da·onan uamangni account-rangko napkujaengani gimin skigiparang jingjengataniko a·bachengatpiltaina tik ka·angaha.
SSA skulrango skigiparang jabongani dormaharangko man·tokkujaengani gimin a·dok gimikni skigiparang, adita salrangna skangsan, ramarango tukampile jingjengatanirangko dakangahachim indiba July 27 tarikna skangan skigiparangna jabrini dormaharangko watatchenggnok ine sorkarini ku·rachakaniko on·ahani gimin skigiparang, jingjengataniko dontongatpilahachim ine nikna man·a.
Indake ong·engon, a·dokni gipin biaprango donggipa SSA skigiparangde an·tangtangni dormaharangko man·tokengahaoba East Khasi Hills a·jani SSA skigiparangde da·onan dormaharangko man·tokkujaenga ine skigiparang matnangatenba, sorkarini kosako jingjengataniko a·bachengpiltaina parakataha.
Iani bidingo Meghalaya SSA Schools Association (MSSASA) East Khasi Hills unit, East Khasi Hills a·jani Deputy Commissioner Isawanda Laloo-ko gronge agangrikaha ineba unit-ni dilgiparang parakataha.
“East Khasi Hills a·jani SSA skigiparang da·onan an·tangtangni dormaharangko man·tokkujaengani gimin ia unit-ni executive committee, central body-ni executive committee baksa tom·e chanchirimenba, jingjengataniko a·bachengatpiltaina tik ka·aha,” ine MSSASA EKH Unit-ni president Wiseterlyne Kharkongor parakataha.
Kharkongor-ni parakatani gitade, East Khasi Hills a·jani SSA skigiparangna dormaharangko watanio ja·manchakengani gimin official-rango sing·sandion, East Khasi Hills a·jao SSA skigiparang hajalni hajal dongani a·sel dormaharangko watna kam ka·anio ja·manchakatako man·enga ine official-rang parakataha.
“Ian pa·sikani kattarangsan ong·aia maina skigiparangna dormaharangko watatengon pilaknan apsansa watna nangachim,” ine MSSASA EKH unit-ni president parakataha.
SSA skulrango skigiparangna February aro March jagnini dormahako on·na gita sorkari gong kror 44-ko watatna aro bangki jagnini dormahanaba corpus fund-oniko gong kror 78 tangkarangko jakkalchengna ku·rachakaniko on·atahachim.
Bangki jasani dormahakoba a·dok sorkari, ma·mong sorkarioniko tangka paisarangko man·soahaon on·na gita a·dok ku·rachakaniko on·atahachim.