SHILLONG: Meghalaya a·doko Trinamool Congress (TMC) dolko a·dokni Chief Minister aro NPP-ni national president Conrad K Sangma be·gruatna aro dolna kam ka·enggiparangko ka·dongagri ong·atna jotton ka·engachim indiba 2023 bilsio dingtanganiko ra·bana miksonganiko uamang ra·piljawa ine Opposition TMC-ni Chief Whip George B Lyngdoh parakataha.
“TMC-ko bilgriatna gita a·dokni CM, NPP ba BJP dolrang gita jotton ka·engnaba gnang indiba batanggimin jarango manderangni bakrimanirangko nike chinga TMC, 2023 bilsio dingtanganiko ra·bana miksonganiko maming dakeba ra·piljawa. Chinga dingtanganiko ra·bana nangnikenga aro iako manderangna u·iatangkugen,” ine Lyngdoh parakataha.
Meghalaya a·doko TMC, soangengaha ine CM-ni agangipa kattarangna Lyngdoh, iako aganchakataha.
Sak 12 MLA-rangoni sak 5 TMC MLA-rangde gipin dolrango napskana gita agangrikengaha ine adita salrangna skangsan Sangma aganahachim.
Sangma-ni iandake agananiko jegalatengon, da·o dipet ia MLA-rangni re·ongkatgnini gimin TMC maming kobor dongkuja ine Lyngdoh parakatskaaha.
NPP dolan a·doko dal·batsranggipa dolsan gita ong·engaha ine Chief Minister-ni agangipa kattarangni gimin janapatengon, je ruling party-ba iandakgipa kattarangkode aganna man·aia indiba manderangsa iakode rai on·gen ine TMC-ni dilgipa parakataha.
Lyngdoh-ni parakatani gitade, da·o ong·enggipa sorkarini tangka jakkalsretanirangna aro ong·gija dake sorkariko chalaianina a·dokni manderangba suk ong·tokjaengahachim.
