TURA: West Garo Hills a·jao District Medical & Health Office-ni Surveillance Worker-na District Selection Committee (DSC)-ni gita 2020 bilsini October 6 tarikoni 8 tarikona ong·atanggipa personal interview-ni result-ko da·onan parakchipkujaenga ine candidate-rang parakatenba, kamna senge dongenggipa chadamberangni namgnina ia interview-ni result-ko ta·raken parakchina didiataha.
Interview-ko mikkangpagipa candidate-rangni parakatani gitade, ia Surveillance Worker-ni kamna 2017 bilsini May 17 tarikon advertise ba jinmana u·iatani ja·man written examination ba porikkako 2020 bilsini August 8 tariko ong·ate ia porikkani result-ko apsan bilsini September 29 tarikon parakahachim.
Uandaken porikka seanio pass ka·gipa candidate-rangna apsan bilsini October 6 tarikoni 8 tarikona personal interview-ko ong·atskaahachim indiba da·o 2022 bilsi bon·angpilengahaoba ia interview-ni result-ko parakchipskakujaenga ine candidate-rang parakataha.
“Surveillance worker-na interview-ni result-ko parakchipgija donengani gimin chinga nangchongmotgipa official-rangko gronge sing·sandion ia result-ko June jani bon·angachibara ong·jaode July jaode parakgnok ine chingna aganahachim indiba da·o July ja bon·angpilonaba result-ko parakchipjaenga,” ine ia kamna interview ra·gipa candidate-rang parakatenba, ia interview-ni result-ko parakchipjaengania District Medical & Health Office-oninma ma District Selection Committee-onisama ine sing·doataha.
