SHILLONG: Meghalaya a·dokni sorkari LP skulrango contract-na skigiparang, kamtangtango rakkipilchina dabie jingjengatanirangko dakengon, contract-na skigiparangko maming chol on·gija kamoniko ra·gale galahani gimin Umroi-ni AITC MLA George Lyngdoh, sorkarini kamo suk ong·gijaniko parakataha.
LP skulrango contract-na skigiparangko 2010 aro 2012 bilsirango kamo rakkiahachim indiba 2018-19 bilsirango MTET porikkako a·bachengatani ja·man contract-o skigiparangni kamko sorkari bon·atahachim ine nikna man·a.
Contract-na skigiparangko iandake kam bon·atahani gimin an·tangni suk ong·gijaniko parakatengon, skigiparangko gadang gadang dakesa kam bon·atna nangachim indiba skigiparangko rang·gitik kamoniko ra·gale galaniara skigiparangoni bang·batakon kamgri ong·e dongata gita ong·aha ine Lyngdoh parakataha.
Kamoniko ra·gale gala man·gipa bang·a skigiparangan da·o bilsi re·angtokahani gimin gipin kamrangna dorgastorangko galna gitaba man·pajaha ineba AITC MLA parakataha.
“Ia skigiparang, bang·gija dormaharangko man·genchimoba, a·dokni chatro chatrirangna an·tangtangni bil ama gitan skie on·paahachim indiba da·alo uamangni kamrangko bon·ataniara namen kragijani ong·aha,” ine Lyngdoh aganaha.
Bang·a skulrangon skigipani kamrang bangbang ong·e dongenga ine janapatengon, ia bangbang ong·e dongenggipa kamrangko maini a·sel sorkari gapatna man·jaenga ine AITC MLA sing·doataha.
“Da·alo an·ching mitam skulrangode skigiparang dongsranggijako nikna nangengaha. COVID-ni a·sel bilsignina chatro chatrirang class-rangko man·jae neng·nikanirangko chagrongna nangaha aro da·o sorkari skigiparangko skulrango on·na man·jaengani a·sel chatro chatrirang, gittamgipa bilsina neng·nikanirangko chagrongna nangenga,” ine Lyngdoh aganaha.
Skulrango skigiparang chu·ongjaengani gimin aro dingtang dingtang gadangni skigiparang, sorkarini kosako jingjengatanirangko daktokengani gimin Congress doloniko ra·gala man·gipa Nongpoh-ni MLA Mayralborn Syiem-ba an·tangni suk ong·gijaniko parakataha.
“Ian sorkarina aro Education department-na rakbegipa kam ong·enga. An·chingan MLA-rang ong·e, ia neng·nikaniko namatna gita gadang gadang dake kamko ka·na nangenga,” ine Syiem, MLA-rangna ku·monganiko on·angaha.