SHILLONG: Me·su-samjak, LPG cylinder aro uandakgipa bosturangko man·chape nangchongmotgipa pilak bosturangni daman ia sal somoirango tang·dorikrikengani a·sel ramram manderang neng·nikanirangko chagrongna nangtokengani gimin damrangko komiate manderangna ra·speaniko on·china gita Hynniewtrep Youth Council (HYC), a·dok sorkariko didiangaha.
Iani bidingo a·dokni Chief Minister Conrad K Sangma-na sedoatengon, nangchongmotgipa bosturangni damko komiatna gita a·dokni Deputy Chief Minister Prestone Tynsong-an songbadrango ku·rachakaniko on·manahachim ine HYC-ni general secretary Roy Kupar Synrem parakataha.
Manderangni neng·nikanirangko olgrokatna gita a·dok sorkari ku·rachakaniko on·ahaoba da·onan maming ja·kurangko de·kujaengani a·sel manderang neng·nikanirangko chagrongna nangtokkuenga ineba Synrem parakataha.
“Nangchongmotgipa bosturangni dam tang·dorikrikengani giminan a·dokni manderang neng·nikanirangko chagrongna nangan baksana mikkang salrangonaba jajrengsotokengaha,” ine HYC-ni dilgipa parakataha.
Synrem-ni parakatani gitade, ia sal somoirango dal, mirong, chini, rasin, me·su samjak, LPG cylinder aro uandake pilak nangchongmotgipa bosturangni daman rakdugaahani a·sel manderang janggi tanganio neng·nikanirangko man·tokna nangengahachim.
“COVID-19 sajinmani a·sel bilsignina manderang neng·bee janggi tangani ja·man manderang da·osa an·tangtangni noksan ong·anirangko man·pilna a·bachengengachim indiba ia sal somoirango pilak nangchongmotgipa bosturangni daman tang·dorikrikbaskaengani a·sel manderang batesa neng·nikanirangko chagrongna nangtokskaengaha,” ine HYC-ni general secretary aganaha.
Indake ong·engon, nangchongmotgipa bosturangni damrangko nirokjringna man·na gita Consumer Affairs department-o Price Monitoring Agency (PMA)-ko songchina gita HYC, sorkariko didiangaha.
Nangchongmotgipa bosturang aro cha·ani bosturangni GST-ko komiatchina ba chu·gimik watsrangchina gitaba HYC-ni dilgipa, sorkariko didiataha.