SHILLONG: Indiani Jakgitelaniko bilsi 75 gapaniko maniani bak gita dake Indian army Umroi Brigade, uamangni Red Horns Division-ni bimango, mingsa mingnamgipa Freedom Ride- Trans Meghalaya Monsoon Odyssey, mingsa pan-state motorcycle expedition ba mottor saikelo songreaniko August 3 oni 10, 2022 tarikrango ong·atenga.
Meghalayani tribal matgrikrangko man·chape, a·songni jakgitelna dakgrikgipa aro janggi on·chakgipa matgrikrangko manderaa·aniko dakna gita ia motorcycle expedition-ko ong·atenga.
Iana agreba, manderangni aro Indian Army-ni gisepo ma·sichakgrikaniko ra·bana aro uandake Meghalayani chadamberangko mingnamgipa sipai kotokni dolo napna gisiko didianiko on·na gitaba ia motorcycle expedition-ko dakani miksongani ong·enga.
Ia Red Horns division-ni expedition-ko, Lieutenant General DS Rana, AVSM, YSM, SM General Officer Commanding Gajraj Corps mijalo Brigadier K.M Shende, Shaurya Chakra, Station Commander Umroi Military Station-ni dilanio a·bachengate on·aha.
Ia expedition-ko August 10 tariko matchotatgen aro ua somoio Umroi-o sipai kotokni tom·aniko ong·atgen jeon Meghalaya Governor Satya Pal Malik mongsonggipa sokgipa ong·e aganprakanggen.
Ia expedition-o sak 25 bikers ba bike salgiparang bakko ra·anggen aro sal chetni gisepo Meghalayani gimik dam 12 district-rangona km 1100 bakrogipa ramarangko songregen.
Indake, Meghalayani mingsinggipa matgrikrang, U Kiang Nongbah, Pa Togan Nengminja Sangma aro U Tirot Sing mangko kima songe dongipa biaprangona songregen aro uamangna mandera·aniko dakanggen, jemangan British sipairangni kosako dakgrikchakahachim.
