AMPATI: Azadi ka Amrit Mahotsav-ni bak gita India a·songni simarango bi·sa badingsrukaniko champengani bidingo manderangna mikrakataniko on·na gita Budbar salo dingtangmancha sensitization program-ko South West Garo Hills a·jani Ampati-o donggipa DRDA Conference Hall-o ong·atangaha.
Ia program-ko National Commission for Protection of Child Rights (NCPCR), State Commission for Protection of Child Rights (SCPCR) aro South West Garo Hills District Administration baksa nangrime ong·atangaha aro ia program-ko South West Garo Hills a·jani Deputy Commissioner SK Marak dilangaha.
Ia program-ko ong·atanio South West Garo Hills a·jani EAC-rang, Superintendent of Police (SP) Siddharth Kr Ambedkar, gipin police officer-rang, Anti Human Trafficking Unit, Juvenile Justice Board, Child Welfare Committee aro Special Juvenile Police Unit-ni official-rang, Child Welfare Police Officer, Social Welfare Officer, District Child Protection Officer aro a·jani dingtang dingtang biaprango donggipa police station-ni officer-rangba dongpae bak ra·angaha.
Ia program-ko ong·atanio NCPCR-oni Expert Resource Person ong·e sokbagipa Rahul Pawa, power point presentation-ko dake, bi·sa badingsrukaniko champengani bidingo jinmana agan-talate on·angengon, Child Rights, Constitutional Rights, Legal Mechanism, NCPCR-ni mongsonggipa miksonganirang aro uandakgipa gipin nangchakegipa kamrangni giminba agan-talate on·angjolaha.
Ia program-ko ong·atanio police department-oni bang·a official-rang dongpae bakko ra·ahani gimin an·tangni kusi ong·aniko parakatengon, bi·sarangan mikkangchi a·songko aro jatko dilnagiparang ong·a ine bi·sarangna naljokaniko on·na nangani gimin Pawa aganangaha.
