SHILLONG: Tura-ni MDC aro BJP-ni state vice president Bernard Marak-ni bidingo West Garo Hills a·jani Deputy Commissioner aro Superintendent of Police (SP)-ko ra·galchina gita Meghalaya a·dokni BJP dol dabiengon, saniba dabiaiani giminde officer-rangko ra·galna gita man·jawa indiba ia officer-rang, niamni a·palo kamko ka·genchimode uamangko sorkari ra·gale galna bil donga ine Budbar salo, Meghalaya a·dokni Home Minister Lahkmen Rymbui talataniko on·angaha.
“Saniba dabiaiani giminde officer-rangko ra·galani katta nakatja indiba uamang niamko pe·e ong·gija kamko ka·genchimode chinga uamangko ra·galna nangaon ga·aka,” ine Rymbui parakataha.
Ia sal somoirango drugs ba pekatgipa samrangko champengna gita sorkari bilake kamrangko ka·enga ine toe janapatengon, iani bidingo police-rangni am·sandianirangko dontongchina aro police officer-ko kam ra·galchina dabigenchimode sorkari uko dakna man·jawa ine Home Minister, talataniko on·angaha.
“Police officer-ni kaman, ong·gija kamrangko champengani aro niam retirangko ja·rikatani ong·a,” ineba ua aganaha.
Dos gri manderangko sorkarini darang officer-rangan dokkol ka·e rona bil dongja indiba police-rangni am·sandianio ua mande maiba bak donggenchimoba, police-rangni dakrongbewal gita uko sing·sandie ra·na ba rim·na bil donga ineba Rymbui parakataha.
“Darangba niamni kosako re·badena bil dongja. Police officer-rangba niamko rakkigipa ong·genchimoba dosgri mandekode kal·ake rona man·ja,” ine Rymbui aganaha.
BJP-ni state vice president Bernard N Marak-ni baganko police-rangni chadrapani aro uko rim·aniara politics-ni gita didiani kamsa ong·a ine BJP-ni matnangenggipani bidingo janapatengon, iani bidingo nanga gita am·sandianirangko dakenga aro West Garo Hills a·jani SP-ba iani bidingo kobor ra·timgiparangna u·iatjringenga ine Home Minister, manderangko chakchike sengkuchina didiataha.