TURA: Meghalaya a·doko Meghalaya Teachers Eligibility Test (MTET) pass ka·gimin candidate-rangko ta·raken kamo ra·china didie, Meghalaya MTET Qualified Association-ni gita a·dokni Education Minister Lahkmen Rymbui-na memorandum-ko on·angaha.
Iani bidingo a·dokni Education Minister Lakhmen Rymbui aro School Education & Literacy-ni Director Ambrose C Marak-na memorandum-ko on·angengon, Meghalaya a·doko bangbang ong·e dongenggipa lower primary aro upper primary skigiparangni kamko ta·raken gapatchina Meghalaya MTET Qualified Association-ni membor-rang didiataha.
Gital MTET porikkako ra·na skangan MTET pass ka·gimin candidate-rangna interview ra·ani chu·gimik kamrangko matchotatchina gitaba association-ni membor-rang, Education Minister-na sedoatgipa memorandum-o didiataha.
Candidate-rangko seokengon, maming taridapa ba kal·aka gri Meghalaya sorkarini dongimin niam gita seokchinaba MTET pass ka·gimin candidate-rang dabiangaha.
MTET pass ka·gipa mitam candidate-rangde, adita jarangni gisepon, kamna dongimin bilsi batna siengaha ine janapatengon, MTET-ko pass ka·gimin candidate-rang pilakan a·dokna dangdike on·na cholko man·pana gita MTET pass ka·gimin pilak candidate-rangnan apsan cholko on·na nanga ine Meghalaya MTET Qualified Association, a·dok sorkariko didiataha.