SHILLONG: Tura-ni MDC aro BJP Meghalaya-ni state vice president Bernard Marak-ni case-ko jakgitele am·sandiatna gita Meghalaya a·dokni Governor ku·rachakaniko on·aha ine BJP-ni state president Ernest Mawrie-ni a·kanganiko a·dokni Governor jegalataha.
Tura-ni MDC aro BJP-ni state vice president-ko adita salrangna skangsan, Tura Edenbari jolo donggipa uni ‘Rimpu Bagan’-ko chadrapeanio, manderangni ong·gija dake roanirangko aro ma·manti bosturangko man·ahani gimin police-rang rim·ahachim.
Sombar salo a·dokni Governor-ko grongeani ja·man, iani bidingo a·dokni Governor jakgitele am·sandianiko dakatna ku·rachakaniko on·ataha ine BJP-ni state president Ernest Mawrie a·kangahachim. Iani bidingo ua a·dokni Governor-na memorandum-koba on·angahachim.
Indake ong·engon, iandake ku·rachakaniko on·aha ine a·kangenganiko Governor-ni Deputy Secretary A Lakiang jegalatskaenba, iani bidingo jakgitelgipa inquiry-ko dakatna a·dokni Governor ku·rachaka dongjachim ine talataniko on·atskaaha.
“BJP-ni state president Ernest Mawrie baksa agangrikani somoio ua uni agananirangkosa knatime ra·aiaha aro batesa iani bidingo ua Mawrie-ko aro gipin dilgiparangko, a·dok sorkarini kamo bakrimchina mol·molataha,” ine Governor-ni deputy secretary parakataha.
