TURA: Meghalaya a·doko drugs ba pekatgipa samrangko badingani aro jakkalani batroroengon, West Garo Hills a·jani police-rang, mande saksaoniko adita pekatgipa samrangko rim·na man·taiaha.
West Garo Hills a·jani SP VS Rathore-ni u·iatani gitade, pekatgipa samrangko badingani bidingo koborko man·soenba, Anti-Narcotics Task Force (ANTF)-ni sipairang, Tura Balading-ni bilsi 32 ong·gipa Chanchu M Marak minggipa mandeko rim·na man·aha.
Ia mandeoniko am·sandion police-rang, rong 576 Tramadol Hydrochloride capsule-rangko man·aha ineba SP parakataha.
Ia mandeoniko police-rang, mobile phone ge·sa aro SIM card ge·sakoba rim·aha.
Iani bidingo police-rang mokordoma ka·enba, ning·tubate am·sandianirangko dakengkua ineba SP parakataha.
Adita salrangna skangmangmangsan Meghalaya a·dokni police-rang, Tura-ona re·baenggipa police constable-oniko ‘heroin’ samrangko man·ahachim aro ja·mano Shillong-o donggipa police constable saksa aro adita heroin samrangkoba man·dapahachim.
