SHILLONG: Ri Bhoi a·jao donggipa karkanarang, 2005 bilsionin bijolini kajinarangko gamchipkujaenga aro ia karkanarangni gro da·o kror 44 batpilengaha ine Bristibar salo National Hynniewtrep People Federation (NHPF) parakataha.
Iani bidingo kobor ra·timgiparangna talataniko on·angengon, Umiam aro Byrnihat-o donggipa dingtang dingtang karkanarango bijoliko jakkalani gimin uamang, Meghalaya Power Distribution Corporation Limited (MePDCL)-ni chief engineer-o RTI ka·e sing·sandianirangko dakaha aro RTI ka·e sing·sandianio man·ani gitade, ia karkanarang 2005 bilsionin bijolini kajinarangko gamchipkujaengachim ine NHPF-ni president Andreas Nongkynrih parakataha.
“RTI report-o parakani gitade, Umiam-o donggipa dam 36 karkanarang, gong kror 2.45-ni bijoli kajinako gamchipkuja aro Byrnihat-o donggipa dam 22 karkanarang, gong kror 42.45-ni kajinarangko gamchipkuja. Ia biap damgnini karkanarango bangki dongenggipa grorangko hisapgenchimode gimik gong kror 44.57-na batpilengaha,” ine Nongkynrih parakataha.
Ia karkanarangni gro kror 44 batpilengahani gimin ia grorangko MePDCL watgenchimode, a·dokni manderang aro mongsongbate Ri Bhoi a·jani manderang maming dakeba ra·chakna man·jawa ineba Nongkynrih parakataha.
“Ramram manderang da·o gita kajinarangko gamna man·jagenchimode Power department aro mongsongbate MePDCL-ni manderang ta·raken ia manderangni bijoliko rate galgnokchim indiba iandake dal·dalgipa karkanarangni indita grorangkode uamang nie dongenga,” ine NHPF-ni president, suk ong·gijaniko parakataha.