SHILLONG: Tura-ni MDC aro BJP-ni state vice president Bernard N Marak-ko Judicial Magistrate First Class-ni kachari Sukrobar salo, bichal ka·enba saldokna police-rangni ning·o dondapataha.
Iani bidingo kobor ra·timgiparangna talataniko on·angengon, Investigation officer-ni bi·ani gitan Marak-ko saldokna police-rangni ning·o donna gita kachari raiko on·ataha ine West Garo Hills a·jani SP Vivekanand Singh parakataha.
Tura-ni BJP MDC Bernard Marak-ko Uttar Pradesh a·doko rim·ani ja·man, iana skangba salchetna police-rangni ning·o donchina kachari raiko on·atahachim ine nikna man·a.
Tura Edenbari-o donggipa ‘Rimpu Bagan’-o me·a me·chikrangko ong·gija dake rona on·enga ine matnangako man·gipa Tura-ni MDC aro BJP Meghalaya-ni state vice president Bernard Rimpu N Marak-ko UP a·doko rim·ani ja·man July jani 29 tariko skanggipa changna kachario mikkangpaatahachim.
An·tangko bame on·china u·iatani ja·manoba katchipe dongahani gimin aro ia bilsini February jao me·chik bi·sa saksako uni bagano drae til·ekgipani bidingo District Sessions Court-ni gita uni kosako non-bailable arrest warrant-ko on·ahani gimin police-rang, uko rim·china gita a·song gimikni police station-rangna u·iataniko on·atani ja·man Tura-ni BJP MDC aro BJP-ni Meghalaya state vice president-ko Uttar Pradesh a·dokni Hapur a·jaoniko police-rang rim·na man·ahachim.
Marak-ko rim·ani ja·manoba police-rang, Rimpu Bagan-ona re·ange am·sandianirangko daktaion, gopretna jakkalgipa bosturangko aro adita silchidarerangkoba man·ahachim.
