TURA: West aro North Garo Hills a·jani ning·o ga·akgipa B-Mahal-ni a·arangko a·dok sorkarini Meghalaya Industrial Development Corporation (MIDC) aro Meghalaya Tourism Development Corporation (MTDC)-na Garo Hills Autonomous District Council (GHADC)-ni Executive Committee palaha ine matnanganirangko nikna man·engon, ia a·arangko jolni manderang aro songni nokmarang baksa agangrikchenggija sorkarina on·ahani gimin jegalna gita Save B-Mahal Committee, re·baenggipa August 13 tariko, jinma tom·bimonganiko Pedaldoba Secondary School kal·chakramo ong·atenga ine u·iataha.
Garo Hills-ni B-Mahal-o ga·akgipa a·arangko Meghalaya Industrial Development Corporation (MIDC) aro Meghalaya Tourism Development Corporation (MTDC)-na NPP-chi dilenggipa Executive Committee pale galenga ine koborko man·soahani giminsa EC-oniko tale ra·na gita GHADC-ni session-o chanchirimna gita Opposition MDC-rang motion-ko ra·baahachim indiba ia motion-ko Executive Committee ra·chakjaha ine adita salrangna skangsan, GHADC-ni Opposition MDC-rang parakatahachim.
Indake ong·engon, iandake B-Mahal-ni a·arangko ia jolrango songdongenggipa manderang baksa agangrikchenggija sorkarina palaniara a·songtangkon pale cha·ani gita ong·enga ine Save B-Mahal-ni chairman Rimjen Ch Sangma parakatenba, iani bidingo jegalna gita jinma tom·aniko ong·atenga ine parakataha.
“Iana skangba, B-Mahal-ni a·arangko gama ge·aniko dakna Israel-ni manderangna palna miksonganiko aro ia biapo Meghalaya Battalion camp kulina miksonganiko B-Mahal-o songdongenggipa manderang jegaltokahachim indiba da·o ia apsan biapniko GHADC-ni dilgiparang, sorkarina pale cha·na miksongtaiengaha. Chingni kobor man·soani gitade, B-Mahal-ni ning·o ga·akgipa hectare 5000-mangni gita a·arangko NPP-chi dilenggipa GHADC-ni EC, MIDC aro MTDC-na palataha aro iana GHADC-ni EC gong kror 58 tangkarangko a·dok sorkarioniko man·soaha,” ine Save B-Mahal-ni chairman parakatenba, ia a·arangara Garo Hills-o songdongenggipa manderangni a·asa ong·a aro iako GHADC, a·dok sorkarina pale cha·na bil dongja ine parakataha.
“Supreme Court-ni dongimin niam gitade, GHADC-ara Garo Hills-ni a·arangko nirokgipasan ong·aia aro nokgipa ong·ja. Indide maikai a·a nokgiparang baksa agangrikchenggija GHADC-ni dilgiparang, ia a·arangko sorkarina pale cha·na man·a?” ineba Save B-Mahal-ni chairman sing·doataha.
