SHILLONG: National People’s Party (NPP)-ni baditaba sak MLA-rang, Trinamool Congress (TMC) aro gipin dolrango napskana agangriktokenga ine TMC-ni MLA aro Opposition dolni Chief Whip George B Lyngdoh a·kangatenba, NPP-chi dilenggipa Meghalaya Democratic Alliance (MDA)-ni ning·o bang·a dilgiparangan meligrikna man·tokjaengaha ine parakataha.
“NPP-chi dilenggipa MDA sorkario bang·a dilgiparangan suk ong·niktokjaenga aro bang·a MLA-rangna NPP-ni tikitrangko on·janaba gnang ine chinga knasona man·enga. Iani giminsa da·o ong·enggipa MLA-rang, gipin dolrangoni susaskana dingtang dingtang dolni dilgiparang baksa agangriktokenga,” ine Opposition dolni Chief Whip George B Lyngdoh parakataha.
TMC-ni sak 12 MLA-rangoni sakbongade gipin dolrango napna miksongenga aro MDA-ni dilgiparangko TMC, rime katna jotton ka·enga ine NPP dolni matnanganina aganchakaniko on·angskaengon, ian NPP dolni skatang chanchie agananisan ong·aia ine Lyngdoh parakataha.
“MDA-ni MLA-rangsa gipin dolrango napna agangriktokenga. MDA-ni bang·a MLA-rangan TMC aro gipin dolrango napna aro re·baenggipa bilsini election-o susana agangriktokenga,” ine TMC-ni dilgipa a·kangataha.
Re·baenggipa 2023 bilsini Assembly election da·o sepangbaroroengahaon, NPP aro TMC-ni gisepo matnanggrikanirangko nikna gita man·engahachim.
