SHILLONG: Adita salrangna skang, Tura-ni Edenbari jolo donggipa ‘Rimpu Bagan’-o jokatako man·gipa bi·sarangna nanga gita chel·chakanirangko on·china Sombar salo, Meghalaya Legislative Assembly Committee for Empowerment of Women, a·dokni Social Welfare department-na ge·etaniko on·angaha.
Sombar salo, ia Assembly Committee, Social Welfare department baksa tom·aniko ong·atangenba, West Garo Hills a·jani Rimpu Bagan-o jokatako man·gipa bi·sa sakdokna nanga gita naljokaniko on·china ge·etangaha.
Tom·a matchotani ja·mano Assembly Committee-ni Chairperson Ampareen Lyngdoh, kobor ra·timgiparangna talataniko on·angengon, je obostao ia bi·sarangko man·ahaoba mikkangchi ia bi·sarang, name janggi tangna man·na gita ia committee nangnike, ia bi·sarangna nanga gita naljokaniko aro dakchakaniko on·china Social Welfare department-ko ge·etangaha ine parakataha.
Re·anggipa July jani 22 tariko, BJP-ni state vice president Bernard Marak-ni ‘Rimpu Bagan’-ko chadrapanio ia bi·sa sakdokko police-rang jokatna gita man·ahachim.
Rimpu Bagan-o jokatako man·gipa bi·sa sakdokoni sakgittamde bilsi 16 aro bilsi 17-ni gisepo ong·giparang ong·a aro bangki sakgittamoni saksade bilsi 15, saksade bilsi 13 aro saksade bilsi 3-san ong·kuengpitichim ineba committee-ni chairperson parakataha.
Indake ong·engon, adita sal somoirangna skang, Nongrah-o so·otako man·gipa bi·sa sakgnini ma·gipana nanga gita tangka paisarangko on·ani bidingoba ia tom·anio committee chanchirimangaha.
So·ota man·gipa bi·sa sakgnini nokdangna gong lak 1-ko on·chengaha aro da·o gong lak 5-ko on·dapna gita kamrangko ka·engaha ineba Lyngdoh parakataha.
East Jaintia Hills a·jani ramao so·otako man·gipa ma·gipa sakgnini gimin janapatskaengon, ia me·chik sakgnioni saksade bi·sa sak 10-ni ma·gipasa ong·achim aro ia sak 10-oni sak 8-de chonkuenggipa bi·sarangsa ong·achim ine Lyngdoh parakataha. Ia bi·sarangko Social Welfare department jako ra·e nirok sandina nanga ine ia tom·anio committee chanchiangaha ineba Lyngdoh parakataha.
