NGH-o chang 8-gipa National Handloom Day-ko manianga

RESUBELPARA: Ba·ra dokanichi a·songni economy-ko ra·doenggipa manderangko mande ra·pilskana gita Sombar salo, changchetgipa National Handloom Day-ko North Garo Hills a·jani Resubelpara-o donggipa Jonglapara Community Hall-o maniangaha.
Ia national handloom day-ko a·song gimikon, ba·ra dokani karkanako tang·doatanichi, ba·ra doke cha·enggipa manderangna nambata janggi tangani gadangko on·na gita maniangtokahachim.
Ia salko manianio North Garo Hills a·jani Extra Assistant Commissioner (EAC) Tadingchi N Sangma, mongsonggipa sokgipa ong·e jinmana aganprakangengon, ba·rarangko dokanichi a·songni namroro silroroanina on·gilpaengani gimin ba·ra doke cha·enggipa mande sakantikon mittelpilangaha.
Ba·ra doke cha·enggipa manderangni namgnina sorkari, dingtang dingtang scheme-rangko aro training-rangko ra·gate on·enga ine talataniko on·angengon, sorkarini on·enggipa dakchakanirangko ra·e an·tangtangni janggi tangani gadangko namdapatchina gita Sangma, jolo ba·ra doke cha·enggipa manderangko didiangaha.
A·songni namroro silroroanina me·chikrangni on·gilanirangni gimin janapatengon, me·chikrangni namgnina sorkari, dingtang dingtang scheme-rangko ra·gate on·aha aro ia scheme-rangoni mingsade handloom sector-nin ong·ani gimin me·chikrang ia cholko ra·e an·tangtangni janggi tanganiko namdapatna man·gen ine Sangma aganaha.
Ia National Handloom Day-ko manianio dongpae jinmana aganprakanggipa gipin manderangara, North Garo Hills a·jani District Sericulture Officer Sanre G Momin, Mendipathar-o donggipa Meghalaya Handloom Training Institute-ni Principal R Ch Rabha, District Handloom Officer CR Marak aro gipinrang ong·a.
Ia salko maniani bak gita North Garo Hills a·jao ba·ra dokanina mingsing minggamako man·gipa manderangna dingtangmancha boksisrangko on·angaha aro Har Ghar Tiranga campaign-ni bak gita dingtangmancha a·songni nisanrangkoba suale on·angaha.