SHILLONG: Assam aro Meghalaya a·dokni simarango golmal ong·enggipa biaprangoni damdok biaprangko namatna gita Memorandum of Understanding (MoU)-ko soi ka·grikani ja·man da·o bangki dongkuenggipa damdok biaprangkoba namatna gita a·dok damgnini chief minister-rang bakan Guwahati songjinmao tom·e chanchirimangtaina gita siengaha.
Raid Nongtung-ni ning·o donggipa Block 2-ni dilgiparang baksa Mongolbar salo, Meghalaya a·dokni Chief Minister Conrad K Sangma, tom·e chanchirimangani ja·man iako kobor ra·timgiparangna parakataha.
Block 2-ni dilgiparang baksa tom·e chanchirimaniko kobor ra·timgiparangna u·iatengon, Block 2-ni ning·o donggipa dam 18 songrang Meghalaya a·dok ning·on ong·na nangnike ia tom·anio sorkarina memorandum-ko on·angaha ine Chief Minister parakataha.
Sangma-ni parakatani gitade, a·dok damgnini simarango songdongenggipa manderang, batanggimin bilsi 50-na neng·nikanirangko chagrongna nangtokengahani gimin uamangni neng·nikanirangko ta·raken namatachina gita ia tom·anio Block 2-ni dilgiparang, a·dok sorkariko didiangaha.
“Simarango songdongenggipa manderangni neng·nikanirangko namatna gita ia sorkari on·kange kamko ka·enga aro iani giminsa sorkari, jolo songdongenggipa manderang baksa agangrikchenge damdok biaprangko namatna gita ja·kuko de·aha. Apsan daken da·o bangki dongenggipa damdok biaprangkoba chinga manderang baksa agangrike kamrangko chu·sokatna ka·dongenga,” ine Chief Minister parakataha.
Ia kamara walsani gisepo matchotatna man·gipa kam ong·ja aro kamko ka·anio somoikode nangaigen ine janapatengon, kamrangko ka·anio niam gita ong·na on·na nanggen ine Sangma parakataha.
Simarango ong·enggipa golmalrangko namatna kam ka·anio agan-chanchirimna nanganirang bang·en donga aro ia kamo pilak nangchongmotgipa dolrangkoba bak ong·atna nanggen ineba Chief Minister aganaha.
Assam aro Meghalaya a·dokni chief minister-rang basako tom·e chanchirimgen, da·o dipet tarikko tik ka·a dongkuja ine talataniko on·angengon, ia tom·aniko Guwahati songjinmao ong·atanggen ine Sangma parakataha.
“Simarango meligrikna man·jaenggipa bangki biaprangko namatna kam ka·anio regional committee-rangko songtaigen aro kamrangko nangani kri ka·anggen. Ia chango kamrang haida rakbatnaba gnang aro ia changode Karbi Anglong District Council-ba bak ong·pagen. Uni gimin skanggipa bako damdok biaprangko namatna kam ka·a gitan ia changoba dingtang dingtang dolrangko, jatni dilgiparangko, district council-rangko aro mongsongbatede jolo songdongenggipa manderangkoba bak ong·atgen,” ine Meghalaya a·dokni Chief Minister parakataha.
