TURA: Garo Hills-o B Mahal-ni a·arangko pale gala aro a·dokni dingtang dingtang kamrangko ka·anio ong·gija bewalrangko ja·rika ine Mongolbar salo, a·dokni gitcham chief minister aro Opposition Trinamool Congress (TMC)-ni dilgipa Mukul Sangma, National People’s Party (NPP)-chi dilenggipa Meghalaya Democratic Alliance (MDA) sorkarini kosako matnanganirangko dakangaha.
Mongolbar salo TMC-ni tom·bimonganiko Dadenggre-o ong·atanio ua, a·dok sorkarini kosako matnanganirangko dakangaha.
Ia tom·bimonganio ua jinmana aganprakangengon, A·chikrangni niam bidik aro daka rikanion a·arangko ripinge rakkianisa ong·achim indiba a·dokni Chief Minister Conrad K Sangma-chi dilenggipa MDA sorkari, B Mahal-o donggipa manderangni a·kingrangko pale cha·skaenga ine matnangataha.
Garo Hills-o A·chikrangni songdong a·chabachenganiko gisik ra·atpilangengon, a·kingrangko chasongni chasongna on·rikrikbaanian A·chik pagitcham ma·gitchamrangni dakbewal rikbewal ong·achim indiba Garo Hills-o donggipa a·kingrangko MDA sorkari, niam gri pale cha·skaenga ine TMC-ni dilgipa, a·dokni Chief Minister Conrad Sangma-ko matnangataha.
“An·tangtangni a·arangko chasong gipinona on·rikrikaninan A·chikrangko mingsing minggama indiba da·alo manderangni a·arangko, uamangnan u·iatchenggija pale cha·skaengaha,” ine Mukul janapatenba, ian Garo Hills-osan ong·aigija Khasi Hills-oba ong·enga ine parakataha.
Garo Hills Autonomous District Council (GHADC)-ni a·ani nokgipa ong·ja indiba A·chikrangni niam bidik aro A·chik pagitcham ma·gitchamrangni dakbewal gita a·arangko niam gri pale cha·na man·jana gita ia a·arangko niroktimgipasan ong·aia ineba Sangma parakataha.
B Mahal ning·o ga·akgipa a·arangko mai miksonganio sorkarina pale galenga ineba ia tom·anio TMC-ni dilgipa sing·doangaha.