TURA: NPP-chi dilenggipa MDA sorkari, Dadenggre-o higher secondary skulrangko kulidape on·na gisik nangjaengani a·sel da·o higher secondary skul damsasan ong·e bang·bata chatro chatrirangan, ia skulo biapko man·jae chubata gadangrango poraidapangna chol ong·jaenga ine re·baenggipa 2023 bilsini Assembly election-o Dadenggre constituency-oni All India Trinamool Congress (AITC) candidate ong·e susana sienggipa Rupa Marak parakataha.
AITC-ni candidate ong·e susana sienggipa Rupa Marak-ara Garo Students Union (GSU)-ni gitcham dilgipaba ong·achim aro uni kobor ra·timgiparangna parakatani gitade, Dadenggre-o higher secondary skul damsasan dongaia aro ia skulo sak 60-70-mangkosan bilsio ra·na man·aiani gimin gipin chatro chatrirangde chubata gadangrango poraidapangna chol ong·jae, an·tangtangni poraianirangko dontongna nangao ga·aktokengachim.
“NPP-chi dilenggipa MDA sorkarini skulrangko kulidape on·na gisik nangjaengani a·sel, bilsiprakon jillarangona re·ange poraipana chol ong·jaenggipa sak 200-300-mangni gita chatro chatrirangde chubata gadangrango poraiangpana chol ong·tokjaenga,” ine Marak parakataha.
Dadenggre constituency-ni MLA James K Sangma, an·tangni constituency-ni manderangna maming namroro silroroaniko ra·bana gisiko nangjaengani gimin Dadenggre constituency-ni bang·a manderangan uni kamo kusi ong·tokjaengaha ineba Marak parakataha.
“James Sangma-ko Dadenggre constituency-o nikna man·rongjani giminan manderang suk ong·tokjaenga aro da·o election-ni somoi sepangbataiengahani giminsa ua re·anggipa anti dipet ia constituency-ona re·bana a·bachengtaiaha. Anga darangkoba matnangna sikja indiba constituency-ni manderangsa aganchakanikode on·na sienga,” ine Marak aganaha.
Dadenggre constituency-ni bang·a manderangan uo ka·dongchakenganiko mesokengani gimin ua re·baenggipa election-o chu·sokgipa ong·na ka·dongenga ineba AITC-ni candidate parakataha.
NPP-chi dilenggipa MDA sorkarini somoio Dadenggre constituency-o mamingni gitan namdapaniko nikna man·jaha ine janapatengon, Dadenggre jolrango rama jal·langrang, lekka porako on·ani kamrang, bijoliko on·anirang aro gipin kamrangoba maming namdapanirangko nikna man·jaha ine Marak parakataha.