SHILLONG: Re·baenggipa December jani 12 tarikoni 16 tarikona Meghalaya International Film Festival-ko Meghalaya Film Makers Association, Meghalaya Tourism department baksa nangrime ong·atenga ine kobor on·aha.
Meghalaya Film Makers Association-ni president Commander Shangpliang-ni parakatani gitade, salgro salaram a·dokrango aro mongsongbate Meghalaya a·doko jawilwat tarienggipa manderang, an·tangtangni jawilwatrangko mesokna cholko man·pana gita aro manderangko jawilwat tarianio gisik on·e an·tangtangna janggi tangani cholrangko dake ra·china didina gita ia Meghalaya International Film Festival-ko ong·atenga.
Shangpliang-ni parakatani gitade, ia festival-ko ong·atengani gimin dingtangmancha ia festival-na Logo aro second 40 ba second 50-ni signature video tarisusaanikoba a·dokni changgipa sapgipa manderangna ong·atenga aro Logo-rangko August 16 ba una skang aro signature video-rangko August 31 ba una skangan sokatna nanggen.
Ia Logo aro Signature Video tarisusaanina dongimin pangchakaniara ‘The Meghalayan Age, Tourism, and Art and Culture’ ong·enga ine talataniko on·angengon, Logo tarisusaanio chegipana gong 10,000/-ko aro signature video tarisusaanio chegipana gong 20,000/- tangkako boksis dake on·ani donggen ine Meghalaya Film Makers Association-ni president parakataha.