AMPATI: Spice Mission 2022-23-ni ning·o Black Pepper-ni program-ko Mongolbar salo, South West Garo Hills a·jani Additional Deputy Commissioner (ADC) AVD Shira, Ampati-ni Multi Facility Centre-o a·bachengate on·angaha aro ia program-ko a·bachengatanio West Garo Hills Agriculture-ni Joint Director SS Kharsati aro South West Garo Hills a·jao donggipa District Agriculture Office aro District Horticulture Office-ni official-rangba dongpae bak ra·angaha.
Ia program-ko a·bachengatani somoio Kerala a·dokni Black Pepper ba gul muris chararangkoba, seoka man·gipa manderangna suale on·angjolaha.
Official-rangni u·iatani gitade, ia program-ni ning·o South West Garo Hills a·jani seokgimin dam 19 songrango seokgimin sak 212 manderangna pang 84,800 gul muris chararangko suale on·angna sienga.
Ia program-ko a·bachengate on·angani somoio South West Garo Hills a·jani ADC AVD Shira, jinmana aganprakangengon, an·tangtangni janggi tangani gadangko namdapatna gita sorkarini on·enggipa cholrangko ra·china gita songni nokni manderangko didiangenba, uni atchutang ambitang ba uni ma·a paarangba, iandake sorkarini dakchakanirangko man·pagenchim ong·ode, uni damben salrango ua nambata sal somoirangko nikpana man·genchim ine parakangaha.
Ia gul muris chararangko ge·enba mikkangchi nambata janggi tangani gadangko man·angchina gitaba ua songni manderangko didiangaha.
Ia tom·anio, West Garo Hills Agriculture department-ni Joint Director SS Kharsati, ia Mission-ni gimin talataniko on·angskaengon, Garo Hills-ara gul murisko ge·na namgipa biap ong·a aro ia Mission-ara, game ge·e cha·enggipa manderangna gul murisrangko ge·e bazar antirango nama damrango pale cha·na dakchakanirangko on·gen ine parakangaha.
Ia gul muris chararangko indinsa suale on·engani gimin skatang gale donaijachina game ge·e cha·giparangko didiangengon, gul murisko niamo pangchake ge·na gita Horticulture aro Agriculture office-rangoniko skie ra·china Kharsati ku·pattiangaha.
Ia program-ko ong·atanio dongpae jinmana aganprakanggipa gipin manderangara, Ampati-ni District Agriculture Officer JS Momin aro gipinrang ong·a.