SHILLONG: 2018 bilsio on·gimin Meghalaya Education Policy-ko pe·e skigiparangko politics-o rimnapanina Meghalaya Pradesh Congress Committee (MPCC)-ni president Vincent H Pala, NPP-chi dilenggipa MDA sorkariko jegalataha.
Skigiparangko politics-ni kamrango bak ra·na on·jawa ine a·bachengon, Meghalaya a·dokni Education Minister Lahkmen Rymbui, talataniko on·angahachim.
Pala-ni parakatani gitade, sorkarini dakchake on·enggipa skul aro college-rango kam ka·enggipa skigiparangde political dolrango bak ong·pana ba politics-ni kamrango bak ra·pana man·jawa ine a·dokni Education Minister-an rake mikrakataniko on·manahachim.
“Indake ong·genchimoba UGC-ni dormahako cha·enggipa aro sorkarini dakchake on·enggipa institute-o kam ka·enggipa professor-ko Chief Minister Conrad Sangma-ni jinmani mikkangon politics-ona rimchaksoaniara namen kragijani ong·aha,” ine Shillong-ni Lok Sabha MP aganaha.
An·tangni matnanganio ua darangkoba biming mingjahaoba, re·anggipa antiosan Prof Malcolm Tariang-ko NPP-ni tom·anio a·dokni Chief Minister-ni dongpaanio dolona rimchaksoahachim ine nikna man·a.
“Ian MDA sorkario, CM aro Education Minister-ni chanchianirang dingtanggrika ine mesokani ong·enga. Skigiparangko politics-o bak ra·jachina Education Minister mikrakatengon, skigiparangko Chief Minister-de politics-ona kusi ong·e rimchaksoskaenga,” ine Pala aganaha.
Sorkari aro sorkarini dakchakenggipa skul, college ba university-rango skie on·enggipa manderang, politics-ni kamrango aro political dolrango bak ra·pana man·jawa ine 2018 bilsini September 21 tariko Cabinet-ni ra·chakgipa Meghalaya State Education Policy-o janapani gnangchim.