Rural Backyard Piggery Scheme-ko ra·gatanichi wak be·en chu·onggijaniko namatna man·gen: Conrad

TURA: Meghalaya a·doko Rural Backyard Piggery Scheme-ko mijal Budbar salni bako, a·dokni Chief Minister Conrad K Sangma, East Garo Hills a·jani Samanda block-o a·bachengate on·angaha aro ia scheme-ko a·bachengate on·angani somoio a·dok sorkarini Chief Whip Marcuise N Marak, Rongjeng-ni MLA Jim Sangma aro dingtang dingtang official-rangba dongpae bak ra·angaha.
Ia scheme-ko a·bachengate on·angani somoio, Samanda-o gital rikgipa pig breeding farm-koba a·dokni Chief Minister, oprake on·angjolaha.
Rural Backyard Piggery Scheme-ko a·bachengate on·angani somoio a·dokni Chief Minister, jinmana aganprakangengon, ia scheme-ni ning·o sorkari, a·dokni seokgimin sak 6000 manderangna wak bi·sa bima manggittam aro bipa mangprakko sualatgen aro ian mikkangchi a·doko wak be·en chu·onggijaniko namatna dakchakani ong·gen ine an·tangni ka·dongchakenganiko parakataha.
Ia scheme-ko a·bachengatanio chu·sokgipa ong·genchimode, mikkangchi a·dok sorkari, sak 15,000 manderangna ia scheme-ni namgniko on·dapanggen ineba Chief Minister parakataha.
Batanggimin bilsibrini gisepo ia sorkari, songadam nokadamrango donggipa manderangni man·gnirangko bariatna aro janggi tangani cholrangko on·na jotton ka·aha ine janapatengon, dingtang dingtang mission-ni program-rangko ra·gatanichi songni nokni manderangna sorkari, dakchakanirangko on·enga ine Chief Minister parakataha.
A·doko lak 4.5-mangni gita game ge·e cha·giparangni janggi tanganiko tang·doatna gita sorkari, dingtang dingtang program-rangko a·bachengate on·aha ineba Chief Minister parakataha.
“Ia project-ni skanggipa bako a·dokni sak 6000 manderangna gong kror 16.92 korosrangko hisape donenga, jeon a·dok gimiko seokgimin manderangna mang 24,000 wak bi·sarangko suale on·anggen,” ine Sangma aganaha.
Chief Minister-ni parakatani gitade, ia Rural Backyard Piggery Mission baksana sorkari, a·doko gong kror 109-ni piggery scheme-ko da·o a·bachengatenga aro ian a·doko dal·batsranggipa piggery scheme ong·gen.
Ia program-ko ong·atanio seoka man·gimin manderangna wak bi·sarangko aro FOCUS program-ni ning·o jolni dingtang dingtang producer group-rangnaba cheque-rangko Chief Minister-ni jakchi suale on·angjolaha.