TURA: Songadam nokadamrango manderangna an·seng baljokaniko on·na man·na gita gital sub-centre-rangko rikna a·dok sorkari, gong kror 165 tangkarangko chame donataha ine Bristibar salo, a·dokni Chief Minister Conrad K Sangma parakataha.
West Garo Hills a·jani Selsella block ning·o donggipa Chambagre songo gital sub-centre-ko rikna pangchakaniko songe on·angani somoio ia kattarangko Chief Minister, jinmana parakataha.
Da·o mikkang bilsi gittamni gisepon a·doko dam 300 gital sub-centre-rangko kulina sienga ineba ia tom·anio Chief Minister parakataha.
“Meghalaya a·dokni pilak songrangon manderangna sanna bananirangko nambate on·na miksonganio sorkari, dingtangmancha Rural Health Strengthening Project-ko a·bachengataha aro ia project-chi songadam nokadamrango donggipa sanchakram biaprangko namdapatna man·gnok,” ine Sangma aganaha.
Chief Minister-ni parakatani gitade, ia project-ko Meghalaya sorkari, SELCO Foundation aro Saura Mandala dol baksa bakrime kam ka·enga.
Ia project-ni ning·o a·dokni pilak PHC aro CHC-rangko namdapatna gita gong kror 350 tangkarangko chamataha ineba ia tom·anio a·dokni Chief Minister parakataha.
Chambagre songo gital sub centre-ko rikna pangchakaniko songe on·angani somoio dongpae bakko ra·anggipa gipin manderangara, Selsella-ni MLA Ferlin Sangma, North Tura-ni MLA Thomas Sangma, Williamnagar-ni MLA Marcuise Marak aro gipinrang ong·a.
