SHILLONG: India a·songni jakgitelaniko man·aoni bilsi 75 gapaniko maniani bak gita Indian Army Umroi Brigade, ‘Red Horns Division’-ni ong·atanggipa Freedom Ride-ko Bristibar salo, Meghalaya a·dokni Governor Satya Pal Malik, Umroi Military Station-o nichaksoenba matchotate on·angjolaha.
Indian Army sipairangni motorcycle sale re·jomaniko ‘Freedom Ride – Trans Meghalaya Monsoon Odyssey’ ine bimingko donenba re·anggipa August 3 tarikoni 10 tarikona ong·atangahachim.
Ia motorcycle-rangko sale re·jomaniko dingtangmancha British-rangni sasononiko warachakna gita dakgrikdilanggipa Meghalaya a·dokni dilgiparangko man·chape a·songni jakgitelanina krengdilanggipa pagitcham ma·gitchamrangko mande ra·pilskana aro mittelpilskana gita ong·atangahachim.
Ia motorcycle-rangni re·jomaniko, Indian Army aro manderangni gisepo meli-nangrimbatataniko ra·bana aro Meghalaya a·dokni chadamberangko Indian Army-o napchina didina gitaba ong·atahachim.
Army-rangni bike-rango re·jomanio, U Kiang Nangbah, Pa Togan Nengminja Sangma aro U Tirot Sing-ko gisik ra·na tarie dongipa mangkrongrangonaba re·ange, dingtangmancha mande ra·pilskaanirangko dakangaha.
Uandaken Bristibar salo, bike-rango re·jomanggipa sipairang, Umroi Military Station-ona sokbapilaha aro uamangko a·dokni Governor Satya Pal Malik rimchaksoe, ia Freedom Ride-ko matchotataha.