SHILLONG: A·dokni manderangko Bharatiya Janata Party (BJP)-o napchina gita National People’s Party (NPP)-ko dilenggipa manderangni didianiara namen aiao inmanani ong·aha ine a·dokni Opposition Trinamool Congress (TMC) parakataha.
“A·dokni Deputy Chief Minister Prestone Tynsong, BJP-ni official chief advisor aro spokesperson ong·aha ine angade ma·sijachim. Ian BJP aro NPP dolrangni gisepo bilake nangrimaniko mesokani ong·enga,” ine Sukrobar salo, TMC-ni state vice president George B Lyngdoh parakataha.
BJP-ni pal maini gimin NPP dolsa ku·rangko on·na nangaha ine sing·doangengon, ian NPP-ni dilgipa aro a·dokni Deputy Chief Minister Prestone Tynsong-ko BJP-ni chief advisor ong·aniko mesokanisa ong·enga ine Lyngdoh parakataha.
“An·ching political dolrango iandake dilgiparangko gipin dolona watatako saoba nikahama? Iano an·ching saksa political dolni dilgipako gipin political dolna chake agananiko nikna man·aha,” ine TMC-ni dilgipa aganaha.
Lyngdoh-ni parakatani gitade, iandake NPP-ni dilgipa ong·e BJP-na chake agananiara, dolgnini gisepo meli nangrimaniko mesokanisa ong·engachim.
Re·baenggipa 2023 bilsini Assembly election-na skang TMC-ni MLA-rangko BJP-o napchina gita adita salrangna skangsan a·dokni Deputy Chief Minister aro NPP-ni national vice president Prestone Tynsong aganahachim ine nikna man·a.