TURA: India a·songni chang 76-gipa jakgitelani salko re·anggipa Sombar salo, a·dokni dingtang dingtang biaprangoba maniangaha aro ia chang a·songni jakgitelaniko man·aoni bilsi 75 gapaniko maniani bak gita a·doko songdongenggipa nokantion, a·songni nisanko songdotokaha.
Meghalaya a·dokni skotong Shillong songjinmao, ia chang 76-gipa jakgitelaniko manianio a·dokni Chief Minister Conrad K Sangma, mongsonggipa sokgipa ong·e a·songni nisanko songdoe on·angaha aro dol 22 parade kal·gipa dolrangkoba salam ka·angaha.
Ia salko manianio dingtang dingtang award-rangko man·gipa manderangna, department-rangna, skulrangna aro dingtang dingtang dolrangnaba Chief Minister-ni jakchi boksisrangko suale on·angaha.
Tura-o a·songni chang 76-gipa jakgitelani salko Matchakolgre LP School kal·chakramo maniangaha aro ia manianio a·dokni Deputy Chief Minister Prestone Tynsong, a·songni nisanko songdoe on·angenba, 2nd MLP Battalion, Goeragre Tura DEF, Tura Government College, Don Bosco College, Don Bosco Higher Secondary School aro Pechon Memorial School-ni NCC dolrang, St. Mary’s School-ni Scouts & Guides aro 2nd MLP Battalion-ni Band Party-ko man·chape gimik dol 13 parade kal·gipa dolrangko salam ka·angaha.
Parade ka·gipa dolrangko West Garo Hills a·jani Deputy Superintendent of Police aro Parade Commander Walsang Momin dilangaha.
Ia salko manianio a·dokni Deputy Chief Minister, jinmana aganprakangengon, a·songni jakgitelanina krengdilanggipa pagitchamrang, jekai Mahatma Gandhi, Pandit Jawaharlal Nehru, Sardar Vallabhai Patel, Subhas Chandra Bose aro uandakgipa dilgiparangko mittelpilangaha. British-rangni sasoniko jakgitelatna gita an·tangtangko on·kange warachakdilanggipa a·dokni manderang, chong·motan U Tirot Sing, U Kiang Nangbah aro Pa Togan Nengminja Sangma-koba ua dingtangmancha ia salo gisik ra·e mande ra·pilskaaniko dakangaha.
Batanggimin jarango mikkarang dontonggija waanganio chirang banne aro a·arangko ruronge bang·a manderangan neng·nikanirangko chagrongna nangtokahani gimin an·tangni suk ong·gijaniko parakatengon, an·tangtangni ka·sagiminrangko gimaatna nanggipa nokdangrangna ua an·tangni kalimpaaniko parakatenba, neng·nikanirangko man·gipa nokdangrangna sorkari, man·a gita dakchakanirangko on·na jotton ka·aha ine parakataha.
A·doko niam retirangko rakkina gita sorkarini kam ka·anirangko janapangengon, manderangna naljokaniko aro chel·chakanirangko on·na gita sorkari, police station-rangko namdapatna aro police dolrangko bilakbatatna kam ka·enga ine Deputy Chief Minister parakataha.
Assam aro Meghalaya a·dokni simarango meligrikna man·jaenggipa biaprango tom·tomaniko ra·bana sorkari kam ka·enga ine janapatengon, meligrikna man·jaenggipa biaprangoni damdok biaprangko skanggipa bako namatna gita Assam aro Meghalaya sorkarirang, re·anggipa March 29 tariko Union Home Minister-ni mikkango New Delhi-o soi ka·grikmanaha aro da·o bangki dongkuenggipa damdok biaprangkoba namatna gita a·dok damgnian survey-rangko ka·na a·bachengengaha ine Tynsong parakataha.
A·doko game ge·e cha·enggipa manderangko dakchakna gita sorkari, 2021 bilsio FOCUS program-ko a·bachengataha aro ia program-ni ning·o producer group-rangna gong lak 1-ona kingking tangka paisarangko dakchake on·enba a·dok gimikni lak 3-mangni gita nokdangrangna namgnirangko on·na man·aha ineba Deputy Chief Minister parakataha.
Manderangna an·seng baljokaniko on·na gita sorkarini kamrangko namdapatani gimin janapatskaengon a·doko an·o donggipa me·chikrangna aro bi·sa bakgitchakrangna nambata sanna bananirangko on·na man·na gita sorkari, Chief Minister’s Safe Motherhood Scheme-ko a·bachengataha aro a·dokni Ganesh Das Hospital, Khliehriat-ni 100 Bedded Civil Hospital aro Nongstoin-o donggipa GNM Nursing School-o State of Art Diagnostic Centre aro Paediatric Intensive Care Unit-rangko kulie on·aha ine Tynsong parakataha.
Lekka porani kamrangko namdapatna kam ka·anirangko janapatskaengon, Jowa, Tura aro Sohra-o donggipa government college-rangko National Assessment & Accreditation Council-ni gita recognise ka·manaha aro sorkari, adhoc higher secondary, secondary, lower primary, upper primary, fourth teacher, science teacher aro hindi teacher-rangni dormaharangkoba adita salrangna skangsan bariataha ine Deputy Chief Minister parakataha.
Ganol hydro project-ko ia 2022 bilsini November jao matchotgnok aro West Khasi Hills a·jani Riangdo-o donggipa River Project-ko 2023 bilsio matchotgen ineba ia tom·anio Deputy Chief Minister parakataha.
Ia salko manianio, dingtangmancha ia bilsini SSLC aro HSSLC porikkao teng·suanggipa chatro chatrirang, dingtang dingtang skulni skigiparangnaba Deputy Chief Minister-ni jakchi mande ra·pilskaaniko dakangaha.
Dingtang dingtang department-rango kam ka·enggipa manderangna aro police officer-rangnaba ia salko manianio, Deputy Chief Minister-ni jakchi mande ra·pilskaaniko dakangaha.
Tableau mesoksusaanio skanggipa boksisko Tura Municipal Board, gnigipa boksisko SP office aro District Social Welfare Office, gittamgipa boksisko Animal Husbandry & Veterinary office man·angskaaha.
March past ka·susaanio skanggipa boksisko Tura Government College NCC Girls, gnigipa boksisko Don Bosco College aro Tura Govt College NCC Boys, gittamgipa boksisko St Mary’s Girls Guide cheangskaaha.
Ia salko maniani bak gita attamchibara dingtangmancha DC XI aro District Football Association (DFA)-ni gisepo exhibition football match-ko Tura Chandmary kal·chakramo ong·atangaha.
North Garo Hills a·jaoba a·songni chang 76-gipa jakgitelani salko Resubelpara Mini Stadium-o maniangaha aro ia manianio Meghalaya Assembly-ni Deputy Speaker aro Resubelpara-ni MLA Timothy D Shira, a·songni nisanko songdoe on·angenba, dol 26 parade ka·gipa dolrangko salam ka·angaha.
Parade ka·susaanio skanggipa boksisko St Thomas Higher Secondary School-ni Brass Band Party, gnigipako Paschal Secondary School-ni chatrirang aro gittamgipa boksisko Resu Higher Secondary School-ni chatrirang cheangskaaha.
Ia salko manianio, adita salrangna skang Shillong-o ong·atanggipa Chief Minister’s Inter School Athletic Meet-o Champion-ni upattiko chebagipa North Garo Hills a·jani kal·susagiparangna dingtangmancha District Sports Promotion Society-ni dakchake on·gipa scholarship award-rangko on·angaha.
Rongtal an·talaniko rakkianina dingtangmancha Gabil PHC aro Wageasi PHC-naba ia manianio Kayakalp award-rangko on·aha.
Apsan daken, South West Garo Hills a·jaoba a·songni chang 76-gipa jakgitelani salko Ampati aro a·jani damgittam block-rangko dingtang dingtang program-rangko ong·ate maniangtokaha.
Ampati-o a·dokni Food, Civil Supplies & Consumer Affairs Minister James PK Sangma, a·songni nisanko songdoe on·angaha aro dol 14 parade ka·gipa dolrangko salam ka·angaha.
Dingtang dingtang porikkarango name chu·sokanggipa chatro chatrirangna, an·tangtangni kamrangko name ka·gipa saksku government employee-rangna aro March Past ka·anio chegiparangna ia manianio Minister-ni jakchi boksisrangko suale on·angaha aro Salmanpara PHC-naba Kayakalp Commendation Award-ko on·angjolaha.
Parade ka·a matchotani ja·mano dingtang dingtang skulni chatro chatrirangni aro dingtang dingtang dolrangni chrok mesaanirang, git ring·anirang aro dingtang dingtang dakmesokanirangkoba nikna gita man·aha.
South Garo Hills a·jaoba a·songni chang 76-gipa jakgitelani salko Baghmara-ni District Sports Office kal·chakramo maniangaha aro ia manianio Chief Minister-ni Adviser aro North Tura-ni MLA Thomas A Sangma, a·songni nisanko songdoe on·angan baksana dol 15 parade ka·gipa dolrangko salam ka·angaha.
Ia salko manianio, COVID-19-ni tikarangko su·anio 100 percent ong·e chu·sokgipa South Garo Hills a·jani dam 10 songrangna gong lak 5 ka·e tangkako boksis dake on·angaha.
Adita salrangna skang, Shillong-o ong·atanggipa Meghalaya State Athletics Meet-o medal-rangko chebagipa sak 12 manderangnaba ia salko manianio, District Administration-ni gita mande ra·pilskaaniko dakangaha.
A·songni chang 76-gipa jakgitelani salko maniani bak gita Baghmara-o Freedom Run aro gipin program-rangkoba ong·atangan baksana hospital arp shelter home-rango dongenggipa manderangna dingtangmancha boksisrangko suale on·angaha.
Indake ong·engon, a·songni chang 76-gipa jakgitelani salko East Garo Hills a·jaoba Williamnagar-ni Rongrenggre Higher Secondary School kal·chakramo maniangaha aro ia salko manianio a·dok sorkarini Chief Whip aro Williamnagar-ni MLA Marcuise N Marak, a·songni nisanko songe on·angaha.
Ia salko manianio dol 30 parade ka·gipa dolrangni march past ka·ani baksana cultural program-rangkoba ong·atangaha.
Ia salko manianio State Level Inter School Athletic Meet-o medal chebagipa chadamberangna mande ra·pilskaaniko dakangan baksana dingtang dingtang gadango kamrangko ka·enggipa manderangnaba mande ra·pilskaaniko dakangaha.
March past ka·susaanio skanggipa boksisko Ferrando Secondary School aro gnigipa boksisko Vidya Mandir Secondary School man·angskaaha.
Ia salko manianio nambatgipa PHC-ni boksisko Dobu PHC-na on·angjolaha.