SHILLONG: BJP-ni candidate-ko seokani bidingo agangipa kattarangna BJP-ni state president Ernest Mawrie-ko nama bewalo kamoni neng·takchina gita BJP-ni national vice president aro Meghalaya in-charge M Chuba Ao-ni didiatani ja·man Mawrie-na a·dokni BJP MLA Sanbor Shullai chakpaaniko parakatskaenba, da·o gita somoio BJP-ni state president-ko dingtangatgenchimode ian BJP dolko namjabegipa obostao galonna gitasa ong·skagen ine parakataha.
BJP-ni tikitko name nichenge aro survey ka·chengesa on·na nanga ine Mawrie-ni agangipa kattarangni gimin talataniko on·angengon, ia kattarangko uni agananio maming ong·gijani dongja aro ua ong·akosa aganengachim ine Shullai parakataha.
Ernest Mawrie-ko term matchote state president ong·china on·na nanga maina da·o gita somoio gital president-ko songgenchimode ian BJP dolna namen kenna nangani ong·gen ineba Shullai aganaha.
Iani bidingo ua Dr Chuba Ao baksa agangrikmanaha aro da·o dipet BJP-ni state president-ko dingtangatkujachina gita ua ma·mongni dilgiparang baksaba agangrikgen ineba BJP-ni MLA parakataha.
“BJP-ni nangchongmotan somoirango Mawrie, doltang baksa ong·e kamrangko ka·aha ine anga an·tangde nikaha aro Garo Hills-oba BJP-na kam ka·enggiparangna ka·dongatanirangko on·aha,” ine Shullai aganaha.
Meghalaya a·doko BJP dolna namgija obostako ra·baaha ine matnangenba, nama bewalo kamoni neng·takchina gita BJP Meghalaya-ni state president Ernest Mawrie-ko BJP-ni national vice president Meghalaya in-charge M Chuba Ao didiatahachim ine nikna man·a.
Mawrie-ni kam ka·ani bewalara uko NPP-na kam ka·gipa gita dake chanchichipna kraataha ineba Ao parakatahachim.
