WILLIAMNAGAR: Williamnagar Bar Association-ni dabiangani ja·man, A·chik Organisation for Social Welfare (AOSW) dolba, Garo Hills Autonomous District Council (GHADC)-ni Court Bench-ko East Garo Hills a·jani headquarter Williamnagar-o donchina gita dabiangaha.
AOSW-ni parakatani gitade, da·o dipet GHADC-ni kachari Tura-osan ong·engkuani a·sel Garo Hills-ni gipin bakrang aro mongsongbate North, East aro South Garo Hills a·jani manderang, kacharini kamrangna Tura-onasa re·angna nange neng·nikanirangko chagrongna nangtokengachim.
“East Garo Hills a·jani ukilrang jekon dabiahachim, uan North Garo Hills, East Garo Hills aro South Garo Hills a·jarango songdongenggipa manderangni neng·nikanirangko nikesa Williamnagar-o GHADC-ni court bench-ko donchina dabienga aro ian nangchongmotgipa dabiani ong·enga. Garo Hills-o da·omangba an·ching kangal cha·asianiko nikna man·engkua aro 75 percent-ni gitade maming kamgri ong·e gama ge·anirango pangchakenggipa manderangsan ong·aia. Iandake cholgri ong·pagipa manderang, kacharini kamrangna Tura-ona re·a doaniara namen neng·beani ong·a maina ia manderango gari gorarangba dongpaja aro re·na dona nanggipa korosrangba chu·onga gita dongpaja,” ine AOSW general secretary Premiar Sangma parakatenba, GHADC-ni court bench-ko Williamnagar-oba dongenchimode uan South aro North Garo Hills a·jani manderangnaba altubatgen ine talataniko on·angaha.
Williamnagar-o GHADC-ni a·arang chu·onga gitan donga ine janapatengon, Williamnagar-o donggipa GHADC-ni a·arangko da·o dipet gipin department-rangnasa para on·enga aro ia a·arangko District Council Court aro pilak branch office-rangnan jakkalskana man·gen ine adita salrangna skangsan Williamnagar Bar Association parakatenba, GHADC-ni court bench-ko Williamnagar-o kulichina didiatahachim.
