SHILLONG: Meghalaya a·dokni BJP dol ning·o meligrikgijanirang ong·engon, BJP-ni dilgiparang pangnan manderangni namgnini gimin chanchiani pal an·tangtangni giminsa chanchibata ine Meghalaya Pradesh Congress Committee (MPCC)-ni president aro Shillong-ni Lok Sabha MP Vincent Pala parakataha.
“BJP dolni ning·o saksa sakgipin baksa dinggrikanirangko an·ching nikna man·enga. BJP-ni president-de maikoba aganenga aro Meghalaya a·dokko nirokenggipade maikobasa aganskaenga. Ian uamangni an·tangtangnasan chanchianiko mesokani ong·enga,” ine Pala aganaha.
BJP dolni ning·o dinggrikaniara an·tangtangni namgninasan ong·aia aro manderangni namgninade ong·jaenga ineba ua aganaha.
“BJP dolni dilgiparang pangnan manderangna kam ka·enga ine a·kangtokronga indiba an·ching pilakan ma·sia uamang an·tangtangni namgnina chanchiaigiparangsan ong·aia,” ine Pala parakataha.
Meghalaya a·dokni MLA sakgni, chong·motan Mohendro Rapsang aro HM Shangpliang, BJP-o napna miksonganirang donga ine BJP MLA AL Hek-ni aganani ja·man BJP dolni ning·o meligrikgijanirang a·bachengahachim ine nikna man·a.
Iani bidingo BJP-ni state president Ernest Mawrie an·tangde iandake chanchirimgipani bidingo maming kobor dongja aro BJP-o napenggipa MLA-rangna joljol tikitko on·na man·aigen ia katta ong·ja ine aganskaahachim.
Mawrie-ni iandakgipa kattarangko aganani ja·man, ua BJP dolko namgija obostao ong·atenga ine uko an·tangan kamoni neng·takchina gita BJP-ni national vice president aro Meghalaya-ni in-charge M Chuba Ao aganskaahachim.
