AMPATI: South West Garo Hills a·jani Indo-Bangladesh simao donggipa Baksapara songni Multi Facility Centre-o Cane & Bamboo Crafts training program-ko Bristibar sal dipet a·bachengataha.
Ia training program-ko Skills Meghalaya Project-ni ning·o Labour department-ni Meghalaya State Skills Development Society (MSSDS), sal 28-na Hathinara aro Baksapara songni gimik sak 120 manderangna ong·atenga aro ian songni nokni manderangna janggi tangani cholrangko on·na gita miksonganio ong·atenggipa program ong·a.
Ia training program-o skie ra·enggipa manderangara, self help group, producer group, kamgri ong·e chadamberang aro be·enni gita cholgri ong·gipa manderang ong·engani gimin uamangna bank account-rangko kulina aro an·tangtangni man·enggipa bosturangko bazar antirango palna sim·na gitaba dakchakanirangko on·enga.
Ia training program-ko a·bachengatanio South West Garo Hills a·jani EAC Armand Momin, mongsonggipa sokgipa ong·e, jinmana aganprakangengon, an·tangtangni janggi tangani gadangko namdapatna gita ia training program-o skie ra·china gita bak ra·enggipa manderangko didiangaha.
Ia program-ko ong·atanio DCIC-ni General Manager DFR Marak-ba dongpae jinmana aganprakengon, jakni kamrangko namdapatna gita uni department, pilak nanga dakchakanirangko on·enga aro iandake training program-rango skie ra·enggipa manderangni tarigimin bosturangko dal·dalgipa jillarangni handicraft emporium-rangona watatskaenga ine parakataha.
Ia program-ko ong·atanio dongpae jinmana aganprakanggipa gipin manderangara, Baghmara-ni DSWCO J Oswin Momin, Skill Development Officer Tesilchi Sangma aro gipinrang ong·a.
