TURA: West Khasi Hills a·jao niam gri bikotengmiting somoio a·sel ong·anichi mande saksa so·otako man·aha aro sakgipin bilongbee saknaanirangko man·aha ine kobor on·aha.
Koborko on·ani gitade, ia a·sel ong·ani Sukrobar pringo West Khasi Hills a·jani Shallang police station-ni ning·o donggipa Urak songo ong·aha. Ia songara Goreng song samba jolo donggipa song ong·achim.
Ia a·selni bidingo koborko man·soa bakan West Khasi Hills a·jani police-rang, ia biapona dariangaha indiba da·o dipet ia biapo mai mancha dake a·sel ong·achim name koborko man·sokujaenga.
A·sel ong·anio sianggipa mandeara, North Garo Hills a·jani Kharkutta police station-ni ning·o donggipa Uguri, Goraimari-oni bilsi 34 ong·gipa Lapendro Sangma ong·achim aro saknaaniko man·gipa mandeba apsan songonin Hendid Momin minggipa mande ong·skaachim ine kobor on·aha.
“Ia biapara namen diltubegipa biap aro ga·nanggijagipa biap ong·e network-rangba name man·gipa biap ong·ja. Ia biapona dolsa police-rang re·angaha aro uamang sokbapilani ja·manosa ia biapo mai a·sel ong·achim, ukode aganna man·aignok,” ine kobor on·timgiparang parakataha.
Batanggimin somoirangoba Meghalaya a·dokni dingtang dingtang koela a·damrango iandake niam gri koelarangko bikotengmiting somoio bang·en a·sel ong·anirangko aro koela a·damo kam ka·giparangni sianirangko nikna aro knasona man·ahachim.
