SHILLONG: Saldokna ong·atenggipa Meghalaya Legislative Assembly-ni Autumn Session-o a·dokni dingtang dingtang nangchongmotgipa kamrangni bidingo NPP-chi dilenggipa MDA sorkariko sing·dona gita a·dokni Opposition Trinamool Congress (TMC) dol tarisamsoenga.
“Meghalaya a·doko songdongenggipa manderangni namgnina dingtang dingtang kamrangni bidingo chinga NPP-chi dilenggipa MDA sorkariko, Autumn Session-ni somoio sing·dona tarienga,” ine Opposition dolni dilgipa Mukul Sangma parakataha.
Autumn Session-ko bakkandikbee ong·atengani gimin janapatengon, Assembly-ni Autumn Session-o nangchongmotgipa kamrangni gimin chanchirimna gita badita somoirangko on·gen da·o dipet Opposition dol ma·sikujaenga ine Sangma parakataha.
Smart metre project aro Saubhagya scheme-ko ra·gatanio ong·gija dakanirangko nikna man·ahani gimin Power minister-ko kam watchina TMC dabigenma ine sing·on, “Ia kamrango badita sak manderang jak dongenggen da·o dipet ma·sikujaengani gimin iani bidingo aganna name man·kujawa. Iani bidingo jakgitele am·sandianiko dakatanian nambatgipa chol ong·gen aro chinga iako Assembly-oba dabiangkugen,” ine TMC-ni dilgipa parakataha.
Assembly-ni Autumn Session-ko re·baenggipa September 9 tarikoni 16 tarikona ong·atna tik ka·manahachim ine nikna man·a.
Assembly Speaker-ni parakatani gitade, ia Autumn Session-o saldok kam ka·ani salrang donggen, jeonin government business-na September 9, 13 aro 16 tarikrangko sualataha aro private membor-rangni business-na September 12, 14 aro 15 tarikrangko donatskaaha.
