Niam gri bikotanio Opp dilgipa matnangata

SHILLONG:  West Khasi Hills-ni Shallang-o niam gri koela bikotgipa biapo a·sel ong·taiani salsa ja·mano, niam gri koela choanirang dontonggijan ong·enga maina a·dok sorkari koela bikotna cholko on·enga aro MDA ua a·selrangko donuenga, sorkariko dingtangatna bilko jakkalchina manderangko TMC Leader of the Opposition Dr. Mukul Sangma aganaha.
“Skanggipao maina ia niam gri koela choanirang ong·enga? Ian maina sorkarini niam gri koela bikotna didie chu·gimik ong·gijako dakna jotton ka·enga ine namen a·selrangko uamango nikna man·enga,’’ Sangma kobor ra·timgiparangna aganao aganaha.
Niam gri koela bikotani ja·pangko a·dok sandina nangtaiengaha. A·doko niam gri koela bikota ba a·dok gipinrangona badinga dongja ine MDA sorkari changni chang jechakeba maina a·doko apsan obosta ong·taitaienga, ine ua aganaha.
West Khasi Hills, Shallang police station-ni ning·ogipa Goreng sepangogipa songgadam Urak Riangdim songo pringni somaio uamango niam gri koela bikote a·sel ong·taiani ja·mano saksa bilongen saknaako man·aha aro saksa siaha.
Niam gri koela bikote a·sel ong·taiako opposition janape sorkari maming ja·kukon de·ja, indakode maina anga sorkariko jak otjawa? Indakgipa kamrang maina uamango ong·enga sorkarina u·iataniko ra·baha, uamang ja·ku de·engama?
“Dongja! ia ong·gija kam ka·anio darangni kosakoba uamang sandia dongja aro niamnaba kenja aro niamna kenode indakgipa a·selrang ong·jawachim,” ua agandapaha.
Koela bikotna ba badingna sorkari uamangna cholko on·a, ua aganaha. “Ia niam gri dakanichi da·alo a·dok namgija bimingko man·enga chinga una kratchaa uni gimin sorkarini tik ong·gijagipa kamko manderang ma·sina nangani somai ong·enga sorkariko dingtangatna uamangni bilko jakkalna nanga,’’ ua agandapaha.