Ma·mong minister Mishra, niamgri kam ka·giparangni kosako ja·ku de·na agana

SHILLONG: Union Minister of State for Home Affairs Ajay Kumar Mishra, Sonibar salo, niamgri koela bikotani gimin janapatengon, ia mamlao a·dok sorkari baksa agangrikaha aro nangnika ong·ode dos dakgiparangni kosako ja·ku de·gen ine aganaha.
“A·doko niamgri kam ka·ani mamlarango sorkari baksa agangrikaha aro dos dakgiparangko rim·a man·ode nangnika gita ja·ku de·gen, ine Mishra, West Khasi Hills district-ni ning·o ga·akgipa Shallang police station, Urak songoni koela cho·gipa siani bidingo ia kattarangko aganataha.
Police dolrang, niamgri kam ka·anirangko champengna raken jotton ka·enga ineba agandapaha.
A·doko changsatai, niamgri koela bikotaniko nikna man·taienga. MDA sorkari, changni chang a·doko niamgri koela bikotanio matnangako jechakenga, indiba niamgri koela bikota aro salruraniko nikna man·kuaienga.
Urak (Riangdim) songo niamgri koela bikotani kamo saksa siaha aro saksa jokkom ong·aha.
Indake ong·engon Union Minister, ia mamlao State Secretariat-o a·dok sorkari baksa agangrikangaha, una agreba central scheme-rangko Meghalaya-o ra·gatani giminba chanchirimaniko dakangaha. “A·songko bilakatna, a·doko bilakatna nangchongmota  aro a·dokni manderang ma·mongni on·gipa scheme-rangko man·na nanga.”
Uandake central scheme-rangko ra·gatani kamrango maiba namnikgijani ba suk ong·gijani gimin sing·on, Mishra indine aganchakangkuaha, “iarang gimikan a·bachenggimingipa project-rang ong·a, uni gimin project-ni gimin kusi ong·ani kattan dongja.”
“Iarangni gisepon salantion kam ka·anirango ra·bianirang soka, uni gimin asonge kamna kusi ong·ani dongja, indiba chinga mikkangchiba a·doni manderangni namgnina kam ka·angkugen,” ine agandapaha.
Hynneiwtrep National Liberation Council (HNLC) -ni gimin janapatengon, ‘ia jolo skang salrangode bang·a dingtang dingtang bobil dolrang dongachim, indiba batanggimin adita bilsirangonide obostarang namkalangengjok aro je kamrangko matchotkujaenga, uarangkoba matchotatna jotton ka·gen, ineba Minister Mishra agandapaha.