SHILLONG: Bilsi 30-ni gisepo ong·enggipa chadamberangan Meghalaya a·dokko dilna gita nangenga indiba a·doko chadamberang politics-o napna gita gisiko nangtokjaenga ine Sonibar salo, Trinamool Congress (TMC)-ni state president Charles Pyngrope, an·tangni suk ong·gijaniko parakataha.
“Da·o dipet an·ching chadamberangko politics-o nikna man·jaenga aro anga skia man·gipa chadamberangkosa ong·katchina nangnikenga. An·chingo skia man·gipa chadamberangan ong·katjaenga ong·ode an·ching a·dokna niksamsoaniko maikai dingtangatna man·gen?” ine Pyngrope sing·doataha.
Pyngrope-ni aganani gitade, ja·delgimin manderangde a·dokko dingtangatna gita chanchianirang bon·aiaha aro chadamberangsa da·o dingtanganiko ra·banade man·aigen.
Re·baenggipa bilsini Assembly election-na candidate-rangko seokani gimin janapatengon, Khasi-Jaintia Hills-ni gimik dam 36 constituency-rangoni dam 24 constituency-nade TMC-ni candidate-rangko sandimanaha ine TMC-ni state president parakataha.
TMC-ni dilgiparang, gipin dolrango napskana miksongenga ine jangbingbangenggipa kattarangni gimin sing·on, “Da·o dipet anga darangonikoba seachi u·iataniko man·soa dongkuja indiba uamang watangna sikbebegenchim ong·ode darangba uamangko champengna man·jawa,” ine Pyngrope parakataha.
Bang·a manderangan TMC-ona re·batokskaenga ineba ua an·tangni kusi ong·aniko parakataha.
