SHILLONG: National People’s Party (NPP)-chi dilenggipa Meghalaya Democratic Alliance (MDA) sorkari, chatro chatrirang, bading chiwalgiparang aro skigiparangoniko ra·seke ra·engani a·sel a·doko maming namroro silroroani dongjaenga ine Sonibar salo, Trinamool Congress (TMC)-ni dilgipa Mukul Sangma matnangataha.
“Chatro chatrirang skie ra·china sorkarini on·enggipa ki·taprang, skulo gana chinanirang aro pilak dakchakanirangko man·tokjaenga. An·chingni dedrangni man·na nanganirangko MDA sorkari cha·e kattokengaha. Ia sorkari adhoc skigiparangni kamrangko bon·attokaha aro MTET pass ka·giparangkoba kamo rakkijaha,” ine Sangma, Pynthorumkhrah constituency-o manderangko biming segatna gita TMC-ni tom·aniko ong·atanio, jinmana aganaha.
Ma·giparangoniko, bading chiwalenggiparangoniko aro dingtang dingtang manderangoniko ia sorkari ra·seke ra·enga aro sanna banani kamrangko namjabatatenga ineba Sangma matnangataha.
Sangma-ni parakatani gitade, Meghalaya Health Insurance Scheme (MHIS)-ko ia sorkari bilding bildang ong·atenba, sanna banani kamrangko namjabatata.
“MHIS-ko ia sorkari bilding bildang ong·atahani a·sel manderang, sanna bananirangko ra·anio bang·bea tangka paisarangko koros ka·na nangtokengani a·sel neng·nikanirangko man·tokengaha,” ine Opposition dolni dilgipa parakataha.
Technical institute-rangna chamatgipa tangka paisarangko sorkari, gipin kamrangna jakkalskahani a·sel chatro chatrirang higher aro technical education-rangko man·tokjaenga ineba Sangma, MDA sorkariko matnangataha.
“A·doko chatro chatrirang vocational education-rangko ra·na man·tokjaengani gimin ma·a paarang detangtangko gipin a·dokrangonasa watatna nangskaengaha. Tura aro Shillong-ni medical college-rangba da·onan be·en pil·kujaengani a·sel doctor-ni kamna poraina nangenggipa chatro chatrirangba gipin biaprangonasa re·angtokna nangengkua,” ine Sangma, an·tangni suk ong·gijaniko parakataha.
Gong kror 172 tangkarangko man·soani ja·manoba Shillong Medical College aro Hospital-ko a·bachengatchipna man·kujaenga ineba ua sorkariko sing·doataha.
