TURA: Tripura a·doko donggipa mitam A·chik songrangko Garoland State Movement Committee (GSMC)-ni dilgiparang grongeaha ine kobor on·aha.
GSMC-ni co-chairman Balkarin Ch Marak aro additional general secretary Bostone M Sangma-ni u·iatani gitade, Tripura a·doko songdongenggipa A·chikrang, Bengalirangni daka rikani gitasa janggi tangna nangtokengani a·sel da·o jattangni ku·sik, daka rikani aro pilak bewalrangkon gimaatangengahani gimin ia A·chik songrangko grongeani somoio GSMC-ni dilgiparang, jattangni dakbewal rikbewalko gamchate ra·china aro ripinge rakkichina Tripura a·doko songdongenggipa A·chik manderangko didibaaha.
Koborko on·ani gitade, GSMC-ni dilgiparang, Tripura a·doko donggipa A·chik songrang, jekai Marakpara, Dupchora, Nagi Chora aro uandakgipa songrangko grongeaha.
“Chingni ia A·chik songrangona re·ange manderangko grongeani somoio, ia songrango donggipa A·chik manderang, Bengalirang baksa songdong a·chana nange da·o jattangni ganding chinding, jattangni ku·aganani aro pilak daka rikanirangko gimaatengaha ine nikna man·aha. Ia A·chik songrango songdongenggipa manderang tangka paisani gita aro pilakni gitan maming dakchakanirangko man·jaengani a·sel ka·donganirangba dongja gita ong·engaha,” ine GSMC-ni dilgiparang parakatenba, Tripura aro dingtang dingtang biaprango songdongenggipa A·chikskarangna bakrimanirangko on·china Garo Hills-o aro gipin biaprango songdongenggipa A·chikrangko didiataha.