Assam-M’laya sorkarirangni soi ka·grikgipa MoU-ko den·galpilchina GH-ni NGO-rang dabia

SHILLONG: Assam aro Meghalaya sorkarirangni memorandum of understanding (MoU)-o soi ka·grikanichi Meghalaya a·dok ning·o ga·akgipa mitam A·chik songrangko Assam-o man·angengani gimin jegalna gita Sombar salo, Garo Hills-ni dolbri NGO-rang, chong·motan Association for Democracy & Empowerment (ADE), A·chik Youth Welfare Organisation (AYWO), Federation of Khasi, Jaintia & Garo People (FKJGP) aro Federation for A·chik Freedom (FAF) dolrang, Shillong Civil Hospital-ni sambao U Kiang Nangbah-ni statue-ko tarie dongipa biapo jinma asonge jingjengataniko ong·atangaha aro ia jingjengatanio Garo Hills-oni Niksamso Garo Community Organisation (NGCO)-ba bakko ra·angaha.
NGO-rangni parakatani gitade, Assam aro Meghalaya sorkarirangni MoU-o soi ka·grikanichi Meghalaya a·doko ga·akgipa mitam A·chik songrangko Assam-o napatahani a·sel ia songrango donggipa manderang aro ia jolrango donggipa dingtang dingtang dolrang, Garo Hills-ni NGO-rangkoba dakchakchina mol·molatahani gimin batanggimin somoirangoba ia dolrang, changni chang jinma tom·bimonganirangko ong·ate ia MoU-ko den·galpilchina Meghalaya sorkariko aro a·dokni Chief Minister-ko didiahachim indiba a·dok damgnini sorkarirangan ia MoU-ko den·galpilna aro ia kamko nipiltaina jechakengani gimin Sombar salo, uamang dingtangmancha a·dokni skotong Shillong songjinmaona re·ange jegalanirangko dakangskaaha.
“Meghalaya a·doko ga·akgipa A·chik songrangko Assam-o napatengani a·sel ia songrango donggipa manderang duk mikchirangko chakna nangengani gimin chinga changni chang a·dokni dilgiparangko aro a·dok sorkariko mol·molahaoba chingni mol·molanirangko knachakna gisiko nangjaenga. Uni gimin A·chikskani duk mikchini somoio dakchakaniko on·na gita da·alo Shillong songjinmaona re·bae, sorkarini kosako jegalaniko mesokangaha,” ine ADE-ni president Dalseng Bira Ch Momin parakatenba, mikkangchiba uamangni dabianiko sorkari knachakjagenchimode, bilakbate jingjengatanirangko dakanggen ine mikrakataniko on·angaha.
Ia jingjengatanio Garo Hills-onisan ong·aigija Khasi, Jaintia aro Ri Bhoi a·jarangoniba dingtang dingtang dolrang re·bae bakko ra·angaha ine FAF-ni president Brinbal Sangma parakatskaaha.
Mikkangchi Meghalaya a·dok gimikni NGO-rang, apsan chanchirimenba, iani bidingo rakbate ja·kurangko de·anggen ineba FAF-ni president parakataha.
Meghalaya aro Assam a·dokni simarango meligrikna man·jaenggipa biaprangoni damdok biaprangko skanggipa bako namatna gita soi ka·grikgipa MoU-ko jegaltokengon, Robibar salosan a·dok damgnini chief minister-rang, gnigipa bakkoba namatna gita Guwahati songjinmao skanggipa changna tom·e agangrikangtaiahachim ine nikna man·a.