SHILLONG: Bilsi gittamna Shillong Smart City-ni financial report-rangko on·jaha ine Trinamool Congress (TMC)-ni national spokesperson Saket S Gokhale matnangatenba, 2019 bilsioni 2021 bilsiona maini gimin Shillong Smart City Limited-ni tom·anirangko ong·atjaha ine Meghalaya a·dokni Deputy Chief Minister Prestone Tynsong-o sing·doangaha.
Iani bidingo a·dokni Deputy Chief Minister-na sedoatengon, “Shillong Smart City Limited-ni tom·anirangko ong·ataha ong·ode maini gimin ia bilsi gittamni gisepo ia company, koros ka·ani report-rangko on·jaha, jinmana talataniko on·china,” ine Gokhale parakataha.
The Companies Act 2013-ni ning·o, company ge·antian bilsini tom·bimonganiko ong·ataoni sal 30-ni gisepon financial report-rangko on·na nanga ine janapatengon, ia dongimin niam gitade, 2019, 2020 aro 2021 bilsirango Shillong Smart City Ltd-ni tom·anirang, March ba September jaon matchotna nangachim ine TMC-ni spokesperson parakataha.
“Company-rangni bilsini tom·bimonganio, company-ni board-rangan korosni hisaprangko see ra·rikna nanga, uni gimin 2019, 2020 aro 2021 bilsirangna financial report-rangko on·jani gimin Shillong Smart City Limited maming pa·sikanirangko on·na man·jawa. Ia bilsi gittamni audit baksana ia 2022 bilsini audit-ko ia bilsiosa ra·aha ine na·a agangenchimode uan niamko pe·ani ong·aha,” ine Gokhale, Deputy Chief Minister-na sedoatgipa chittio parakataha.
Shillong Smart City Limited-na ma·mong aro Meghalaya sorkarirang, krorni kror tangkarangko chame on·ani ja·manoba bilsi gittamna financial report-ko on·gijani gimin Deputy Chief Minister-ni pa·sikaniko on·aniara namen aiao inmanani ong·aha ineba TMC-ni dilgipa parakataha.