TURA: SSA skulrango skigiparangni dingtang dingtang dabianirangko sorkarini knachakjaengani gimin All Garo Hills SSA School Teachers Association (AGHSSASTA)-ni gitaba re·baenggipa September-ni 5 tariko Skigiparangni Salko manianio jingjengatskana tik ka·angaha.
AGHSSASTA-ni parakatani gitade, adita salrangna skangsan, a·dokni Education Minister Prestone Tynsong, skigiparang baksa agangrikanio, ma·mong sorkarioniko tangka paisarangko man·soahaon, skigiparangni man·na nangkuenggipa chu·gimik dormaharangkon on·na ku·rachakahachim indiba da·alona kingkingan SSA skulrango skigiparang jagnini dormaharangko man·tokkujae neng·nikanirangko chagrongna nangtokengahachim.
“SSA skulrango skigiparangna bangki dongkuenggipa dormaharangko chu·gimik on·gnok ine Education Minister-ni ku·rachakaniko on·ani ja·manoba chingna da·onan chingni man·na nangkuenggipa dormaharangko matchote on·kujaenga. Indide ma·mong sorkarian tangka paisarangko watatkujaengama ma a·dok sorkarisa skigiparangni dormaharangko dingtang miksonganio ra·chipe donengama?” ine AGHSSASTA sing·doataha.
Gitcham sorkarini somoiode skigiparangna jabrini arrear-rangko somoi gitan on·ahachim indiba da·o NPP-chi dilenggipa MDA sorkarini somoiode skigiparangna dormaharangko on·a tik on·jan baksana skigiparangni dabiani gita dormaharangko bariataniba dongja, skigiparangko kamo regularise ka·aniba dongja aro skigiparangna Teaching Learning Material (TLM)-ni tangka paisarangko on·aniba dongja ineba AGHSSASTA parakataha.
“Election-na skangde ia sorkari, lekka porani kamrangnan gisik on·bate kamko ka·gen ine ku·rachakaniko on·ahachim indiba da·alo SSA skulrango skigiparang cha·a gri ringa grisa kamtangtangko ka·na nangenga. Indide da·o 2023 bilsini Assembly election-na skang adita jarangni gisepo maikai sorkarini SSA skigiparangna aro Education department-na ku·rachakaniko chu·sokatna man·gen,” ine AGHSSASTA sing·doataha.
AGHSSASTA-ni parakatani gitade, uamangni mongsonggipa dabianiranga, dormaharangko somoi gita on·jringchina, skigiparangko kamo regularise ka·china, jachetni arrear-rangko ta·raken changsano on·china aro dormaharangko bariatchina dabianirangan ong·engachim.