SHILLONG: Re·baenggipa 2023 bilsini Meghalaya Legislative Assembly election-o Pynthorumkhrah constituency-oni susana gita National People’s Party (NPP)-ni tikitko da·o ong·enggipa BJP-ni MLA AL Hek-ni gritang Rocky Hek-na on·ahani gimin mikkang bilsiode Pynthorumkhrah constituency-o uamang mamasani susagrikaniko nikna man·gnok.
AL Hek-ni grigipa Rocky Hek, Bristibar salo NPP dolo napeaha aro uko NPP-ni national president Conrad K Sangma baksana NPP-ni gipin dilgiparang rimchaksotokahachim.
Rocky Hek-ko NPP-ona rimchaksoangengon, re·baenggipa 2023 bilsini Assembly election-o NPP dol, Rocky-kon Pynthorumkhrah constituency-ni candidate-na seokaha ine NPP-ni national president aro Meghalaya a·dokni Chief Minister Conrad K Sangma parakataha.
“Chinga Rocky Hek-ko NPP-ni nokdangona rimchaksoenga aro ukon 2023 bilsini Assembly election-na 14-Pynthorumkhrah constituency-ni candidate-naba seokaha. Rocky saksa ongipa gadangni manderang baksaba meligipa ong·a aro manderangna dangdike on·na skani donggipa mande ong·a. Uni NPP-ona re·baaniara Pynthorumkhrah constituency-ni manderangna chingni dangdike on·anio kamrangko nambate ka·na dakchakani ong·gnok,” ine Sangma parakataha.
Ia apsan salon Rocky baksana Pynthorumkhrah constituency-ni gipin dilgiparangba NPP-ona re·baahani gimin uamangkoba NPP-ni president rimchaksoangaha.
Rocky Hek-ba BJP dolni gitcham membor ong·achim indiba ua re·baenggipa 2023 bilsini Assembly election-o an·tangni mamatanggipa baksa susana BJP-oni ong·kate NPP-o napskaaha.
