SHILLONG: Meghalaya a·doko niam gri koelarangko bikotanio NPP-chi dilenggipa MDA sorkari jak donga ine Opposition Trinamool Congress (TMC) dolni matnanganiko a·dokni Chief Minister Conrad Sangma jegalatenba, MDA sorkariko rikchengaonin ia sorkari, a·doko niam gri koela badinganiko champengna ja·ku de·aha ine parakatskaaha.
Chief Minister-ni parakatani gitade, 2018 bilsio MDA sorkariko rikchengaonin ia sorkari, MMDR Act-ko ra·gatenba niamrangko rakbatataha aro niam gri koela badingenggipa bang·a manderangkon rim·na man·ahachim.
Niam gri koela badinganio jak donga ine NPP-chi dilenggipa MDA sorkarini kosako matnanganina Opposition dolni dilgipa Mukul Sangma-ko jegalatengon, uni bilsichetna a·dokni chief minister ong·engmiting somoirango uni sorkari, a·doko niam gri koela bikotaniko champengna maming ja·kurangko de·jaha ine Sangma matnangatskaaha.
“A·doko niam gri koelarangko bikotna gita sorkarioni dakchakanirangko on·ani katta dongja. Gitcham sorkarini somoirangosa da·o gita niam gri koela badinganiko champengna maming ja·kurangko de·srangjahachim,” ine Chief Minister, kobor ra·timgiparangna aganaha.
Niam gri koelarangko badingani bidingo bang·en case-rangko ka·aha aro bang·a manderangni kosako ia sorkari ja·kurangko de·aha ineba Chief Minister parakataha.
“Niam gri koela badinggipa bang·a manderangkon ia sorkari rim·aha. Uni gimin darangba gipinko skatang jaksi otna man·jawa. Uamang (Opposition) gipinko jaksi otna skangba, an·tangtangni somoio maiko dakaha uko ma·sichengna nanga,” ine Sangma aganaha.
Adita salrangna skang, West Khasi Hills a·jao niam gri koela bikote mande saksa siangna nangahani gimin aro sakgipin saknaanirangko man·na nanggipani gimin janapatskaengon, ia koela a·kolni nokgipako police-rang rim·aha ine Chief Minister parakataha.
“Banoba maiba kamrangko niam gri ka·enga ong·ode an·chingo niamrang donga aro niamni kri ja·kurangko de·angaigen. Dos dakgipa manderangko sasti on·na gita an·chingo niamrang donga,” ine ua aganaha.
