TURA: Meghalaya a·dokni gitcham minister aro Rangsakona constituency-o changgittamna MLA ong·anggipa Adolf Lu Hitler Marak, BJP Meghalaya-ni gitcham vice president David Ch Marak aro Education department-ni gitcham joint director Bhupendra G Momin baksa All India Trinamool Congress (AITC)-o napangaha.
Ia sakgittam dilgiparang Bristibar salo, AITC-ni MLA Zenith Sangma, sakgipin MLA Lazarus Sangma aro adita sak MDC-rangni mikkango AITC-o napangaha.
Ia dilgiparangko AITC-ona rimchaksoani somoio, Rangsakona-ni AITC MLA Zenith Sangma, jinmana aganprakangengon, ia dilgiparangni AITC-o napanide a·bachengani gitasan ong·aienga maina da·o re·baenggipa salrango bang·a dilgiparangan AITC-o naptokna gita siengaha ine parakataha.
Gitcham minister Adolf Lu Hitler Marak-ni gimin aganangengon, “Ua saksa manderangni seokako man·e a·dokna dangdike on·aha. Ua Rangsakona-ni MLA ong·e a·dokni minister-ba ong·angaha aro da·alo chinga uko chingni dolona rimchaksona gita namen kusi ong·a. Da·alo AITC-ona budepa, chadambe pilakan re·batokengaha aro mikkangchiba apsan daken ong·angkugen,” ine Zenith aganaha.
Adolf Lu Hitler Marak, a·dokni namroro silroroaniko nikna sikengani giminsa maming niam donani gri AITC-o napaha ineba Sangma parakataha.
Re·baenggipa 2023 bilsini Assembly election-o a·dokni pilak dam 60 constituency-rangon AITC susagen ineba Zenith parakataha.
Ia tom·anio a·dokni gitcham minister Adolf Lu Hitler Marak-ba jinmana aganprakangengon, da·o mikkang bilsio gital sorkariko TMC rikskagnok aro uaba saksa Garo Hills-oni gitcham dilgipa ong·e TMC dolna dakchake on·anggen ine parakataha.
Assam aro Meghalaya a·dokni simarango ong·enggipa obostarangko namatna gita a·dok damgnini soi ka·grikgipa MoU-ni gimin janapatengon, ia a·arangara manderangnima sorkarinima uko sing·cheng sanchengesa sorkari, ia a·arangko Assam a·doko napatani gimin chanchina nangachim ine Marak parakataha.
Gitcham minister Adolf Lu Hitler, gipin dilgiparang baksa AITC-o napanga
Date:
Share post:
