SHILLONG: Ia sal somoirango Meghalaya a·dok gimikon chirangko chu·onga gita man·tokjaengahani gimin a·dokni PHE Minister Renikton Lyngdoh Tongkhar, an·tangni suk ong·gijaniko parakatenba, chiring chibisikrangko tangatpilna nangengani gimin janapataha.
A·song gimiko mikka wabatsranggipa biap ong·genchimoba Meghalaya a·doko da·o chirangko chu·onga gita man·jaengaha ine an·tangni suk ong·gijaniko parakatengon, mikka chirangko chake jakkalchina gita ua a·doko songdongenggipa manderangko didiataha.
Sukrobar salo, Shillong-ni State Convention Centre-o ong·atanggipa North East Water Conclave-o dongpae bak ra·angani ja·man kobor ra·timgiparangna talataniko on·angengon, “An·chingni pilak biaprangon da·o chiring chibisikrang tiproroangengahani gimin ian an·chingna namen jajrengsona nangani somoi ong·engaha. Uni gimin an·ching mikka chirangko chake jakkalskana nangengaha,” ine Tongkhar parakataha.
Chiring chibisik donggipa biaprangko ripinge rakkina nangengani gimin janapatengon, ia biaprangko songni nokni manderangoniko breskana man·na gita a·dok sorkari, ma·mong sorkarioniko tangka paisani gita dakchake on·aniko nangenga ine PHE Minister parakataha.
“Songni nokni manderangoniko a·arangko brejaskalde ia chiring chibisik donggipa a·arangko jako ra·na gita sorkarina altua kam ong·jawa. Ia chiring chibisikrangko darangba kal·akna man·jana gita an·ching ia biaprangko chel·chakna nangenga. Ia biaprango an·ching bolrangkoba ge·na nangenga aro bolrangko ge·an baksana dingtangmancha niamrangkoba donna nangenga,” ine Tongkhar aganaha.
